Lau hilabetean, Aralar eta Auñamendi kaleen artean igogailu berria
Bi geldialdi izango ditu Lezoko kaleko bigarren igogailuak. Bi kaleen artean egun dauden eskailerak mantenduko dituzte hasera batean.
Gaur hasi dira Lezoko Aralar eta Auñamendi kaleak (Ijurkon) lotuko dituen igogailuaren lanak. Lezok izango duen kaleko bigarrena da, kiroldegia eta Altamira batzen dituenaren ondoren. Udalak adierazi du lanek lau hilabeteko epea izango dutela, beraz, 2021aren hasierarako erabiltzeko moduan egongo da epeak betetzekotan.
Igogailuak Aralar kalean izango du sarrera, eta bi geldialdi: lehena Auñamendi kaleko 5, 7 eta 9 zenbakiek duten terraza publikoan; bigarrena Auñamendi kaleko 9. zenbakiaren goialdean.
Lanek 232.565 euroko aurrekontua dute (BEZ barne). Construcciones Moyua SL enpresak egingo ditu. Hartara, lanek iraun bitartean eragozpenak izan daitezkeela adierazi du Lezoko Udalak, eta horiek suertatuko balira barkamena eskatu du: “Eragozpenak eragozpen, behin obrak bukatu eta igogailua martxan denean auzoarentzat suposatuko duen onurak mereziko du”.
Lanen ondorioz, inguru horretako hondakinen ontziak lekuz aldatu dira oinezkoek bide alternatiboak izan ditzaten. Aldi berean, Auñamendiko goiko aldera doazen eskailerak hasera batean zabalik mantenduko dira. Lanen aurreragoko faseetan itxiko dituzte.
