Xabier Leteren bertso eta kanta zaharren kontzertuarekin itxiko dute Kulturabirusa
Ane Badiolak, Joxe Leon Kazabonek eta Irati Odriozolak kontzertua emango dute hilaren 12an, Gurutzen. Sarrerak Urrats paperdendan jaso beharko dira.
Irati Odriozola eta Ane Badiolak kantatuko dituzte Leteren bertsoak, Joxe Leon Kazabonek musikatuta.
Kulturabirusa Oiartzungo kultur bizitza suspertzeko asmoarekin antolatu zuten. Uztailean herriko sortzaileak izan ziren protagonista eta abuztuan, berriz, eragileak.
Uda bukatzen ari da —hiru aste falta dira—, eta Kulturabirusari txertoa jarriko dion ekitaldia antolatu dute hilaren 12rako (larunbata).
Xabier Lete zena izango da protagonista; Joxe Leon Kazabonek —gitarrararekin— eta Irati Odriozola eta Ane Badiolak —ahotsarekin— Leteren bertso eta kanta zaharrak musikatu eta kantatuko dituzte. Kontzertua Gurutzeko pilotalekuan izango da, 19:00etan hasita.
Sarrerak
Egoerak behartuta, toki kopurua mugatua izango da, ehun eserlekuetara. Horregatik, sarrerak aldez aurretik jarriko dituzte eskuragarri. Gaur —hilak 2— arratsaldetik aurrera lor daitezke, Urrats paperdendan; turismo bulegoa astelehenean itxi zutenez, bertan lortu beharko dira.
Paperdenda 09:00etatik 13:00etara eta 16:30etik 19:30era egoten da irekita, astelehentik ostiralera. Larunbatetan, berriz, goizez bakarrik egoten da irekita.
