"Lasai bizi nahiak" bildu ditu, beste behin, ehunka antxotar
Pasa den osteguneko elkartzeari jarraipena emanez Antxoko Auzo Elkarteak deitutako bilkurak Gure Zumardia jendez bete du, berriro. Taldea hurrengo astean bilduko da Pasaiako alkatearekin.
Gaurko elkarretaratzea, Gure Zumardia plazan. 
Antxoko Auzo Elkarteak gaur, 20:00etan, Gure Zumardia plazan elkartzeko deia egin die antxotarrei. Herriak, aurreko astean egindakoaren ildotik, babesa erakutsi nahi izan dio Elkarteari eta ehunka lagun bildu dira alamedan. Txalo artean hasi dira hizketan deialdiaren arduradunak, herriari emandako erantzunagatik eskerrak emanez. Iragarri dute gaurko kontzentrazioa “elkarbizitzaren alde egindako deia” izan dela, “Antxotarrek lasai bizi nahi dugulako”.
Pasaiako alkate den Izaskun Gomezek elkarteari bilera bat eskatu diola azpimarratu nahi izan dute, eta hurrengo astean direla gobernuburuarekin biltzekoak, Arizabalo Jauregian bertan. Topaketa horretan herritarren ezinegona eta antxotarrek sentitzen duten utzikeria helaraziko diote eta, batez ere, udalak hartuko dituen konpromiso eta neurriak entzuteko prestutasuna agertuko dute. Orduan hitz egindakoa sare sozialen bidez iragarriko dutela jakinarazi diete herritarrei eta, “Eskerrik asko eta gora Antxo!” hitzekin eman nahi izan diote amaiera jardunari.
