"Irakasle batek bik beste" balio duelako, AEKn matrikulatzera deitu dute
Oarsoaldeko AEK-k abian du ikasturte berrirako matrikulazio kanpaina. Eskaintza oso-osoa aurkeztu du, aurrez aurreko eskolak ardatz hartuta.
AEK-ko irakasleak, kanpainaren berri ematen. Lanean hasi dira Oarsoaldeko AEK-ko lau euskaltegietako irakasleak. Lanean jarraitzeko, ikasleak behar. Horregatik, 2020-2021 ikasturterako matrikulazio kanpaina abiatu dutela jakinarazi dute AEK-ko kideek. Irakasleak jarri dituzte kanpainaren erdigunean. Irakasle batek bik beste balio du; hori kanpainaren leloa. “Izan ere, irakasleak irakasten daki eta ikasleentzat ezinbesteko akuilua da; ikastea nahi du. Beste era batera esanda, irakasleak dira AEKren altxorrik preziatuena, ikaslearen pertsonarik gertukoenak”. Hala, irakasleen esperientzia eta eskarmentua, nahiz horien pasioa eta gogoa balioan jarri dituzte, “Oarsoaldeko AEK-ko euskaltegietan hogei bat eskarmentudun irakasle ditugu ikasleei bultzada emateko prest”.
Matrikulazio kanpainaren ardatzen berri emanda, euskararen normalizazioan jarduten duen eragileak aurrez aurreko eskoletan jarri du beste oinarria. COVID-19agatik martxoko etenaldiaren ondoren, eta teknologia berriei esker ere eskolak eman eta jaso daitezkeela jakitun, aurrez aurreko klaseen aldeko apustua egingo dute, nola ez, segurtasun neurriak mantenduta: ikasleen arteko distantzia eta talde txikiagoak, musukoen erabilera, garbitasuna mantentzeko produktuak… “Gertu nahi ditugu ikasleak, sinetsita baikaude gertutasunak ikas-prozesuan laguntzen duela”. Ildo horretatik, Lezoko Oroitzenen jada martxan direla jakinarazi dute: B2 eta C1 mailak egiaztatzeko eskolak ematen ari dira.
Eskaintza
Askotariko eskaintza du esku artean AEK-k: euskalduntze ikastaroak, mailak egiaztatzekoak, autoikaskuntza, merkatari eta gurasoentzako ikastaroak, langabeentzat eskola trinkoak, mintza taldeak, Mintzalaguna, Aizu! aldizkaria… Zerrenda oso-osoa da. Eta horietan izena ematen dutenek bekak lortzeko eskubidea dutela oroitarazi dute, asistentzia bermatzen bada.
Erabileran oinarritutako metodologia erabiltzen dute AEKn. “Hori da gure iparrorratza, eta pandemiak pandemia, ez dugu norabidea aldatuko. Euskara ikasteaz edo hobetzeaz gain, zure egunerokoan euskararen erabilera areagotzea lortuko duzu, euskaraz bizitzea alegia”, adierazi dute euskaltegietako irakasleek.
Irailaren bukaerara arte eman daiteke izena AEK euskaltegietan. Honakoak dira Oarsoaldekoak:
- Xenpelar AEK euskaltegia (Errenteria-Orereta). Biteri kalea 30, 1. pisua. Telefono zenbakiak: 607 56 92 00 eta 943 34 02 33. Posta elektronikoa.
- Intxixu AEK euskaltegia (Oiartzun). Aialde kalea 2, Fermiñene Etxea 1. Telefono zenbakiak: 607 53 42 63 eta 943 49 39 57. Posta elektronikoa.
- Txirrita AEK euskaltegia (Antxo). Zumalakarregi kalea 9. Telefono zenbakiak: 607 54 53 81 eta 943 52 55 45. Posta elektronikoa.
- Oroitzene AEK euskaltegia (Lezo). Donibane kalea 12, atzealdea. Telefono zenbakiak: 607 59 88 71 eta 943 51 91 44. Posta elektronikoa.
