Hika aritzen ikasteko ikastaro praktikoa egingo dute
Ttur-tturrek, udalak eta Euskaraldiaren taldeak antolatu dute hika ikastaro praktikoa. Urriaren 14an hasiko da, eta sei saio egingo dituzte.
Ttur-ttur Euskaltzaleon Bilguneak, Oiartzungo Udalak eta Oiartzungo Euskaraldiaren lan taldeak hika ikastaro praktikoa antolatu dute udazken honetarako. Hitanoa hitz egiten hasteko, ohitzeko edo hobetzeko helburuz antolatu dute ikastaroa.
Urriaren 14tik azaroaren 19ra bitartean egingo dituzte ikastaroko saioak, asteazken edo ostegunetan. Sei saio izango dira guztira, kiroldegiko bilera gelan. Ordu eta erdi iraungo du bakoitzak; 18:30ean hasi eta 20:00etan bukatuko da.
Izena eman nahi dutenek hilabeteko epea izango dute, irailaren 14tik urriaren 14ra. Horretarako, Ttur ttur Euskaltzaleon Bilgunera idatzi beharko dute, edo 943 26 01 82 telefono zenbakira deitu.
Ikastaroa dohainik izango dela iragarri dute. Gisa horretako ikastaro praktiko bat antolatu duten hirugarren da hau.
