Xabier Lete prosa eta poesia lehiaketa lanak aurkez daitezke
Aurtengoa 23. ekitaldia izango da. 8 eta 18 urte arteko haur eta gaztetxoek har dezakete parte. Lanak urriaren 29ra arte aurkez daitezke.
2019ko sari banaketako irudia. Martxan da Xabier Lete prosa eta poesia lehiaketa. Aurtengoa 23. ekitaldia izango da, eta 8 eta 18 urte arteko haur eta gaztetxoei zuzenduta egongo da.
Baldintzei dagokienez, lanak argitaratu gabeak eta euskaraz izango dira. Idazle bakoitzak lan bakarra aurkez dezakeela gogorarazi dute. Lanak izengoiti batekin sinatuta egongo dira, eta aparteko gutun batean jarri beharko da izen hori, barruan idazlearen datuak adierazita daudela.
Lanak udaletxeko Euskara zerbitzuan aurkeztu beharko dituzte. Urriaren 29a izango da azkeneko eguna. Lehiaketaren oinarri guztiak esteka honetan ikus daitezke.
Hogei sari
Hamar kategoria egongo dira, eta bakoitzean bina sari banatuko ditu udaleko Euskara sailak. DBH3 mailara arte, opari-txartelak banatuko dituzte. Hortik gora, esku-dirua emango diete irabazleei.
Aurten, berritasun gisa, akzesitak banatzeko aukera ere izango dela iragarri du udalak. “Lan horiek gainontzekoekin batera argitaratzeko ahalegina egingo dugu”, gaineratu du.
Udalak dei berezia egin die DBHtik gorako ikasleei, lehiaketan parte hartzeko deia eginez.
Xabier Lete prosa eta poesia lehiaketaren sari banaketa abenduren 4an egingo dute, poeta oiartzuarraren heriotzaren urteurrenean. Iaz erantsi zioten Leteren izena lehiaketari.
