Albaolako ontzigintza eskolako lehen hiru ikasleak graduatu dira
Nazioarteko eskolak 2017 irailean hasi zuen bidea hiru ikasleekin; haste honetan graduatuko dira eurak eta sei berri hasiko dira ontzigintza tradizionalaren ogibidea ikasten.
Ezkerretik eskuinera, Manuel Goethals, Javier Vizcaya eta Rémi Fennebresque. Argazkia: Albaola Itsas Kultur Faktoria. 
Albaola Itsas Kultur Faktoriak harro eta poztasunez iragarri du Aprendiztegi, Lance Lee ontzigintza eskolako lehen hiru ikasleak graduatu direla. Horri esker, eskolaren mugarri nagusietako bat lortu da: “Hurrengo belaunaldiei lanbide ia galdu bat irakastea, hau da, ontzigintza tradizionala”. Javier Vizcaya (euskalduna), Manuel Goethals (bruselarra) eta Rémi Fennebresque (marseillarra) ikasleen agurrarekin, Anglet, Girona, Madrid, Irlanda eta Kaliforniako sei ikasle berri hasiko dira.
Hiru urteko esperientzia-prestakuntzaren eta proiektu ugariren ondoren, graduatu berri diren ikasleek beharrezko trebetasun guztiak eskuratu dituzte ontzi tradizionalak eraikitzeko, teknika tradizionalak eta modernoak konbinatuz, baina, batez ere, ontzigintza tradizionalaren lanbidea mantentzeko. Urte hauetan 5 ontzi eraiki eta uretaratu dituzte, San Juan baleontzia eta Juanita Larando patatxe kortsarioa eraikitzeko lanak burutu dituzte eta zaharberritze lanak egin dituzte, besteak beste.
Eskolara sartzeko baldintzei dagokionez, bi gauza eskatzen zaizkie ikasleei: motibazioa eta konpromisoa. Izena emateko epea zabalik egongo da abendutik otsailera bitartean eta eskola doakoa da, benetan ikasi nahi duen orori aukera ziurtatzeko. Hala ere, Albaola elkartea babesle bila dabil egitura hau horrela mantendu ahal izateko.
