COVID-19gatik positibo bat gehiago Jesusen Bihotza egoitzan
Hamabost egoiliar positibo dira une honetan, eta egoitza bereko lau langile ere kutsatu dira.
Azken orduetan egindako PCR probek positibo berri bat hauteman dute Jesusen Bihotza adinekoen egoitzan. Gaur egun 53 kasu aktibo daude Gipuzkoako adinekoen zentroetako egoiliarren artean, eta horietatik 15 Gabierrotako egoitzari dagozkio. Gipuzkoako adinekoen lau egoitzek dituzte COVID-19 kasu aktiboak erabiltzaileen artean: Hernaniko Santa Maria Magdalena (29), Errenteria-Oreretako Jesusen Bihotza (15), eta Donostiako Alai-Etxe (7) eta Hernani Garate-San Ignacio (2). Horietatik bederatzi daude ospitaleratuta, eta 29 Eibarko Ospitaleko gizarte solairuan daude, COVID-19 kasuen arretarako erreferentziazko zentroan.
Ondokoa da, zehazki, Jesusen Bihotza adinekoen egoitzako egoera: hamabost egoiliar positibo daude une honetan; horietako bi ospitalean daude, eta lau Eibarko zentrora eraman dituzte. COVID-19ak kutsatutako gainontzeko bederatzi egoiliarrak Jesusen Bihotza adinekoen egoitzan mantendu dituzte.
Hori egoiliarrei dagokionean. Izan ere, langileak ere kutsatu dira eta une honetan, Jesusen Bihotza egoitzako lau langile dira COVID-19an positibo.
