Eztenako hiru emanaldi bertan behera gelditu dira
Ikuskizun bateko kide batek COVID-19an positibo eman duelako gaurko bi emanaldi eta biharko beste bat etetea erabaki dute, segurtasunagatik.
Eztena Arte Eszenikoen Jaialdiaren barruan gaur eta bihar artean egitekoak ziren hiru emanaldi bertan behera gelditu direla jakinarazi du Errenteriako Udalak, gaurko biak eta biharko beste bat.
Izan ere, gaurko programatuta zegoen Satiro ikuskizuneko (19:00etan zen, Niessenen) kide batek positibo eman du COVID-19aren PCR proban, eta ondorioz, harekin harremana izandako Erresistentzia arazo fisikoa da ikuskizuneko (20:30ean zen, Niessenen) aktorea ere isolamenduan gelditu behar izan da. Gaurko bi saioak bertan behera, beraz. Horiekin lotuta, biharko Panpina ikuskizuna ere (17:00etan zen, Niessenen) etetea erabaki du Errenteriako Udalak, babes neurri gisa.
Eztenaren barruko biharko beste bi ikuskizunek, horiek bai, argia ikusiko dute. 19:00etan, Sra. Polaroiskak Alamedako dantzaldia performancea egingo du Koldo Mitxelenako jolastokian. 22:00etan, musikaren txanda: Hatxe errenteriarrak Panpin hautsien dantza diskoa aurkezteko kontzertua emango du Niessenen.
