Bir-ziklatu aurkeztu dute, bizikletak berreskuratzeko proiektua
Gaur egun, Gurpil artean elkarteak Oarsoaldean abian jarritako tailer hori baino ez dago Gipuzkoan, "Bir-ziklaturen helburua da Gipuzkoako beste eskualde bakoitzak haren antzeko tailer bat izatea".
Bide bazterretan abandonatuta edo erabiltzen ez diren bizikletei bizitza berria eman nahi diete, berreskuratu eta birziklatu, berriz ere erabilgarri izan daitezen. Bir-ziklatu proiektua sortu dute horretarako, eta atzo arratsaldean aurkeztu zuten Errenteria-Oreretako Beraun auzoan Gurpil Artea elkarteak duen tailerrean. Rafaela Romero Mugikortasun eta Lurralde Antolaketa diputatua eta Jose Ignacio Asensio Ingurumena eta Obra hidraulikoen diputatua izan ziren bertan.
Erabilerarik ez duten bizikletak eta horien piezak berreskuratu eta berrerabiltzea da proiektuaren helburua, sistema publiko sozial bat ezarrita. Herritarrei zerbitzua ematen jarraitzea dela helburua azaldu zuten, baita hondakinak alferrik ez sortzea: “Bizikleta horiek berreskuratuta, proiektu honek kontsumitzeko beste modu bat sortzen du, eta ekitate sozialaren alde lan egin”.
Lau esparrutan esku hartuko du Bir-ziklatuk, prozesu osoa kudeatuko duen gizarte oinarri sendoarekin. Honakoak dira: Gipuzkoako hiri hondakin solidoak kudeatzeaz arduratzen den mankomunitateen arteko lankidetza hitzarmenak egingo dituzte, hondakinen bilketa, aukeraketa eta tratamendu prozesuetan bizikleten eta horien osagaien tratamendu berezia ziurtatzeko, gerora, bizikleta horiek irabazi asmorik gabeko erakundeei emateko; irabazi asmorik gabeko tailer kolaboratiboak sortuko dituzte, bestalde, bizikleta horiek konpondu eta berrerabiltzeko; tailer kolaboratibo horien sarea antolatzea da beste esparrua; azkenik, berreskuratutako bizikleta horientzako kalitatezko labela ezarriko dute, gizarte ekimeneko erakundeek konpondu dituztela ziurtatzeko.
Gurpil Artea, Gipuzkoako bakarra
Beraun auzoan kokatuta dago Gurpil Artea elkartearen tailerra. San Markos Mankomunitatetik eta Errenteriako Udalak duen ibilgailuen gordailutik jasotako erabilerarik ez duten ehun bizikleta baino gehiago konpontzen dituzte bertan, urtero. Gaur egun, Gurpil artean elkarteak Oarsoaldean abian jarritako tailer hori baino ez dago Gipuzkoan, “Bir-ziklaturen helburua da Gipuzkoako beste eskualde bakoitzak haren antzeko tailer bat izatea”.
