Atxilotu bat eta bi ikertu, lapurreta baten harira
Goizaldeko ordu biak aldera deia jaso dute ertzain etxean Iztieta auzoan hainbat pertsonen arteko liskarraren berri ematen.
24 urteko gizon bat atxilotu du Ertzaintzak indarra erabilita lapurreta egitea egotzita. Gainera, 20 eta 27 urteko beste bi lagun ikertzen ari da, gertaera horrekin lotuta egon daitezkeelakoan. Goizaldeko ordu biak aldera deia jaso dute ertzain etxean Iztieta auzoan hainbat pertsonen arteko liskarraren berri ematen. Bertaratu direnean, borrokan ari ziren lau lagun topatu dituzte eta horietako bat beraiengana hurbildu da. Beste hirurek, ondotik asa denean drogak eskaintzen hasi zaizkiola esan die ertzainei, ezetz esan diela eta orduan poltsa lapurtzen saiatu direla lehenik, eta lepoan zeraman zilarrezko katea kendu diotela gero. Katea kentzerakoan zauriak egin dizkiote lepoan, eta halaber, hainbat kolpe eta ukabilkada eman dizkiotela esan die ertzainei Segurtasun Sailaren arabera.
Inguruaren miaketa eginda, zuhaixka batzuen atzean aurkitu dute lapurtutako katea. Indarkeria erabilita egindako lapurreta egotzita atxilotu dute ustezko egilea, eta parte hartzea egotzita ikertu gisa diligentziak zabaldu dizkiete beste bi lagunei.
