Jesusen Bihotza erresidentziako egoiliar bat hil da azken orduetan
Une honetan COVID-19arekin kutsatutako 16 egoiliar dira Jesusen Bihotza egoitzan.
Gipuzkoako Foru Aldundiak jakinarazi duenez, COVID-19an positiboa zen Gabierrotako adinekoen egoitzako egoiliar bat hil da azken orduetan. Aldundia arduratzen da kudeatzen dituen adinekoen egoitzetako egoeraren berri emateaz, eta prentsa ohar bidez eman zuen heriotzaren berri atzo arratsaldean. Une honetan COVID-19arekin kutsatutako 16 egoiliar dira Jesusen Bihotza egoitzan.
Asteartean, beste heriotza baten berri eman zuen aldundiak. COVID-19arekin kutsatuta zegoen egoiliarra zendu zela jakinarazi zuen.
Jesusen Bihotza egoitzako egoiliarraz gain, beste bi adineko hil dira azken orduetan Gipuzkoako adinekoen egoitzetan, Hernaniko Santa Maria Magdalena egoitzakoak ziren biak.
Aizpea Otaegik, Errenteriako alkateak, babes eta elkartasun mezua helarazi die sare sozialen bidez Jesusen Bihotza egoitzako egoiliar, langile zein bertan diren adinekoen senideei.
Oso aste gogorra ari gara pasatzen Gabierrotako #JesusenBihotza adinekoen egoitzan. Orain arte ez bezala, azken egunetako PCR positiboek eta heriotzek astea ilundu digute. Gure babes osoa bertako langileei, egoiliarrei eta familiei. pic.twitter.com/o07aYSnB7H
— Aizpea Otaegi (@AizpeaOM) September 17, 2020
