Portuko kutsadura salatu zuen ekintzailea hilaren 24an epaituko dute
Lezoko Badian Bizi taldeak elkarretaratzera deitu ditu herritarrak, ekintzaile lezoarrari "babesa emateko eta egoera salatzeko".
Lezoko Badian Bizik deialdia egiteko erabili duen euskarria. Irudia: Lezoko Badian Bizi. 2018ko azaroaren 21ean portuak sortzen duen kutsadura salatu zuen lezoarra astelehenean epaituko dutela jakinarazi du Lezoko Badian Bizi taldeak. Orduko hartan Trintxerpen oinezkoentzako igarobide bat inauguratu zuten hainbat agintarik. Ekintzaileak, lezoarra, sutautsa bota zien. Hari sostengua eman nahi diotenei deia egin die taldeak, hilaren 24ko (osteguna da) 13:00etan Donostiako epaitegian egon daitezen, elkarretaratzean.
Lezoko Badian Biziren arabera, herritarrak “nazkatuta” daude portuaren jarduteko moduarekin: “Hustuketa-zamaketa lanak ez dira behar bezala egiten, egunero hauts eta keak arnastu behar dituzte. Onartutakoa baino zarata handiagoak jasaten dituzte, baita gauez ere. 2018ko abuztuaren 2an Lezoko moiletan gertatu zen suteak, hala ere, alarma guztiak piztu zituen eta herritarren haserrea gogor piztu zen”.
2018tik gauzak ez direla aldatu uste dute taldekideek, “jarduera baimenik gabe diharduten enpresek kutsatzen eta herritarren bizi kalitatea eta osasuna suntsitzen jarraitzen dute”. Horren aurrean, gaian eskumena duten erakundeak “isilik eta geldi” daudela adierazi dute Lezoko eragilekoek: “Egoera hori eta horrek herritarrengan sortzen duen inpotentzia salatu nahi izan zituen Lezoko herritarrak”.
