Zail du San Pedrok, ez ezinezko
Eusko Label Ligara igotzeko play-offa izango du jokoan San Pedrok asteburuan. Zarautz, Pedreña, Ares eta Samertolameu izango ditu aurrean.
Igoeraren bila doaz moreak. Argazkia: Sanpedrotarra AE. Eusko Label Ligara igotzeko play-offa izango du jokoan asteburuan San Pedrok. Bihar Bermeon (18:30) eta etzi Portugaleten (12:00) erlojupekoak jokatuko ditu kontrario izango dituen beste lau traineruekin: Zarautz, Pedreña, Ares eta Samertolameu. Bost traineru, eta 2021ean gizonen arraunaren goren mailan egoteko bi plaza. Zail du Libia ontziak bi horietako bat eskuratzea, baina ez da ezinezkoa.
Sasoi hasieran, beharbada, sanpedrotarrek ez zuten espero play-off postua lortzea. Bazekiten traineru orekatua zutela, eskarmentudunen eta gazteen arteko nahasketa zutela, baina KAE1 Ligan hain goian eta banderak irabaziz egotea, ziurrenik, ez zegoen Mikel Arostegi entrenatzailearen planik baikorrenetan. Baina hala izan da, aukera bat dute iaz galdutakoa urtebete geroago berreskuratzeko. Eta aukerak baliatzeko dira.
Aurrean izango dituzten traineruen artean Zarautz eta Pedreña bi plazak eskuratzeko faboritoen zerrendan daude, adituen arabera. Baina San Pedroren potentziala ez da gutxietsi behar inolaz ere, uretan egonik azaldu behar delako norberaren benetako maila. Erlojupekoak izanik, kaleen arteko alderik ez; ikusi beharko da mareen eragina zein den.
Galiziako bi ontzietaz ez dago erreferentzia askorik. Jakina da Galiziako Ligan bi lehenak izan direla eta hori zerbaitegatik izan dela. Baina bostak elkarrekin izan diren estropada bakarrean, Kontxarako sailkapen estropadan, play-offean dauden bost traineruen artetik azkenaurren eta azkena izan ziren Galiziakoak, ez alde handiarekin, ordea. Beraz, haiekin ere kontuz.
Aurtengo lehiaketa ofizialetan behin izan dira bost traineruak elkarrekin lehian, irailaren 3an, Kontxarako sailkapenean. Orduko hartan, bosten artetik Zarautz izan zen azkarrena 20:16ko denborarekin, bigarrena Pedreña zarauztarrekiko 18 segundo geroago, hirugarrena San Pedro (+22), laugarrena Samertolameu (+28) eta azkena Tiran (+32).
Gipuzkoako Txapelketan (uztailaren 15ean), ordea, elkarrekin izan ziren Zarautz eta San Pedro. Enbata ontziak Libia baino sei segundo lehenago bukatu zuen lana.
Bestalde, KAE1 Ligan izan dira elkarrekin aurten Pedreña eta San Pedro. Joseba Fernandezek entrenatzen duen ontzia maiz izan da sanpedrotarren aurretik.
Beraz, esandakoa: San Pedrok igoera zaila du, baina borrokarik gabe, ezin jakin noraino iristeko aukera duen bakoitzak.
