Adinekoak omenduko ditu EMKEren bandak igandean
Errenteria-Oreretako nagusienei begirako kontzertua 12:30ean hasiko da, Koldo Mitxelenak jolastoki estalian. Gonbidapena behar da joateko.
Errenteriako Musika Kultur Elkartearen (EMKE) bandak elkartasun keinua egingo die bihar (hilak 20, igandea) herriko adinekoei. Kontzertu berezia eskainiko die haiei, omendu nahi ditu, aitortza egin nahi die, COVID-19ak eragindako osasun larrialdi egoeran adinekoak izan direlako sufritu dutenen artean gehiengo. Zaharrak berri kontzertua prestatu dute haientzat. Igandeko 12:30ean hasiko da, Koldo Mitxelenako jolastoki estalian.
Urteko nagusienei begirako musika emanaldia egiten du EMKEren bandak Jesusen Bihotza adinekoen egoitzan. Aurten ezin izan da han egin emanaldia, horregatik lekualdatu dute Koldo Mitxelenara. Bertan, egoerak eskatzen dituen neurriak betearaziko dituzte. Ikusleek, nola ez, musukoa eraman behar dute derrigor; Koldo Mitxelenako neurrietaz antolatzaileak arduratuko dira, eta horiek bete behar direla gogoratu dute.
Alain Aierdik zuzenduko duen musikazaleen taldeak Euskal Herriko hainbat pieza ezagun eta abesgarri eskainiko dizkie bertaratutakoei (behean egitaraua). Beraz, handiki gozatzeko moduko kontzertua izango da. Jai giroko egitaraua bildu dute emanaldira, eta besteak beste, pandemiak eraginda bertan behera geratu diren Euskal Herriko jaietako doinuak joko dituzte: Iruñeko, Baionako, Donostiako, Bilboko eta Gasteizko doinuetan zehar musika bidaia egingo dute.
Doan da emanaldia, baina aurrez gonbidapenak eskuratu behar dira, aforo muga dagoelako. Horiek hilaren 17an jarri zituzten publikoaren eskura Niessen Kulturguneko harrera gunean. Oraindik geldituko balira, eskuratzeko aukera dago.
