[Bideoa eta galeria] Ez dira igo, baina herriak goratu ditu
Ia ezustean, igotzeko aukera esku artean izan du San Pedrok. Pena, baina ez du lortu. Dena dela, herritarrek harrera beroa egin diete arraunlariei.
Pena. Baina San Pedrok ezin izan du iaz galdutako maila berreskuratu. Eusko Label Ligako play-offean ez du lortu mailaz igotzea. Baina a zer bi estropada egin dituen Libia-k asteburuan! Atzo, bosgarren eta azken izan arren, irabazletik 4,66 segundora iritsi zen helmugara. Gaur, Portugaleteko bigarren egunean, bigarren izan da. Eta asteburuan, nahiz sasoian egindako lanagatik, herriak arraunlariei harrera egin die gaur. San Pedroko trainerua ez da mailaz igo, baina herritarrek goratu dute.
Beranduegi da atzoko estropadaz, edo gaurkoaz hitz egiteko. Oraintxe ez du zentzurik esatea atzo hiru segundo gutxiago egin izan balira, eta gaur beste hiru gutxiago, Eusko Labeleko kide izango zela San Pedro. Zarautz eta Tiran igo egin dira bi egunen artean hobeak izan direlako, eta listo. Pena, baina emaitzak egoskorrak dira: onartu behar. Baina lastima…
Bazkalorduan sanpedrotarrak kalera atera dira herriko arraunlariei harrera egitera. Eskertu egin dute kirolariek herritarren berotasuna, eta aurten irabazitako lau banderak (hiru KAE1 Ligakoak, beste Santoñako Bandera) harro, pozez astindu dituzte. Sasoiko azken eguna izan da gaurkoa. Baina sasoiari errepasoa egiterakoan, Mikel Arostegi entrenatzaileak erabiliko dituen hitzen artean bat izango dela ziur: pena. Ia ezustean oso hurbil izan du San Pedrok igoera. Hurrengo urtean penak kitatzeko tartea ez da galdu behar.
Behean, gaurko harreraren hainbat argazki eta bideoa. Eskerrik asko Xabier Isasari eta Sanpedrotarra Arraun Elkarteari irudiok HITZAra bidaltzeagatik.
