Berotegi efektuko gasen isurketa nabarmen murriztu da
Energia iraunkorrerako ekintza planaren jarraipena egin du udalak. Bi urtean behin egiten du jarraipen hori eta azterketaren emaitzen arabera, 2018 urtera arte 80.000 tCO2b (karbono aztarna) baino gehiago murriztu da BEG berotegi efektuko gasen isurketa udalerrian.
Energia iraunkorrerako ekintza planaren jarraipena egin du udalak. Bi urtean behin egiten du jarraipen hori eta azterketaren emaitzen arabera, 2018 urtera arte 80.000 tCO2b (karbono aztarna) baino gehiago murriztu da BEG berotegi efektuko gasen isurketa udalerrian. Emaitza hori, besteak beste, energia eraginkortasunaren hobetzeari, herritarrak sentsibilizatzeko kanpainei eta diru laguntzei esker lortu dela sinistuta azaldu da udala, baita hurrengo bi urteetan lortutako emaitzek gora egingo dutela ere, “abiatutako ekintzei esker eta oraindik ere martxan ez daudenak ezartzen hasita”.
2008. urtean Alkateen Ituna sortu zen hirien eraginkortasuna energetikoa hobetzeko, energia berriztagarrien erabilera areagotzeko eta energia politika iraunkorren testuinguruan ekintzak sustatzeko. Horretarako, energia Iraunkorrerako Ekintza Plana erabiltzen da, eta udalerrian, 2020rako berotegi efektuko gasen isurketak gutxienez %20 murriztea da helburua. Errenteria-Oreretan 2007. urtearekin alderatuta aurten %20ko murrizketa lortzea finkatu zen konpromisoetako bat izan zen. Ez da bakarra, 77 neurri zehaztu baitziren Energia Iraunkorrerako Ekintza Planean, energia mahaia, ingurumen mahaia eta Energiaren Euskal Erakundeko teknikariekin elkarlanean.
Neurri horien gauzatzea eta aurrerapena bi urtero aztertzen du udalak, eta orain, bigarren jarraipena egin du. 2018. urtera arte Errenteria-Oreretako energia plana ezartzeko 45.029.912 euroko inbertsioa egin zuen udalak —aurreikusitako aurrekontu osoaren %57— orotara, 79.066.989 euro inbertituko ditu. Kopuru horretatik %29 udalari dagokio, %58 sektore pribatuari eta %13 beste administrazio publiko batzuei.
