Lau gizon atxilotu dituzte bi lapurreta egotzita
20, 21, 26 eta 27 urte dituzte atxilotuek eta aurrekariak dituztela azaldu du Segurtasun Sailak. Epailearen aurrera eraman zituzten atzo bertan; laurak espetxera bidali ditu.
Udaltzaingoak eta Ertzaintzak atxilotu zituen lau gizonak. Udaltzaingoak eta Ertzaintzak lau gizon atxilotu zituen igande goizaldean. Lau gizon horiei indarkeria erabilita lapurreta egitea egotzi diete; zehazki bi gazteri lapurtzea egotzi diete. Atxilotuetako bati autoritateari eraso egitea egotzi diote, gainera, Segurtasun Sailak prentsa oharrean jaso duenez, atxilotzeko unean polizietako bati eraso egin ziolako.
Alde Zaharrean lapurreta egin zietela salatu zuten bi gaztek igande goizaldean bertan. Gazteetako bat lau lagunen artean eraso zuten eta bultzaka eta kolpeka aritu ostean, kartera eta eskuko telefonoa ostu zizkioten Segurtasun Sailak jakinarazi duenez. Udaltzainek kiroldegi inguruan aurkitu zituen ustezko egileak eta Ertzaintzaren laguntza eskatu zuen. Eraso eta lapurreta egin zioten gazteak, lau ustezko egileak identifikatu zituen, eta laurak atxilotu zituzten indarkeria erabilita lapurreta egitea egotzita.
Lapurreta hori baino momentu batzuk lehenago autobus geltoki batean beste gizon bati lapurreta egitea egotzi die lauri. Salaketan gizon horrek esan zuenez, talde bat hurbildu, lurrera bota, ostikoak eta ukabilkadak eman eta soinean zuen poltsa lapurtu zioten.
20, 21, 26 eta 27 urte dituzte atxilotuek eta aurrekariak dituztela azaldu du Segurtasun Sailak. Epailearen aurrera eraman zituzten atzo bertan; laurak espetxera bidali ditu.
