Osasun eta edertasun establezimenduak sustatuko ditu bi astez Bizi Errenteria iniziatibak
Hirugarren dinamizazio kanpainaz gain, beste ekintza bat jarri du martxan udalak Bizi Errenteria Iniziatibaren barruan. Ile-apaindegiak eta liburu dendak batu ditu horretarako.
Errenteriako Udalak Txoke eta Suspertze Planaren barruan antolatutako Bizi Errenteria iniziatibak bidea egiten jarraitzen du. Bertako saltokiak suspertzea eta babestea du helburu iniziatibak, herritarrak bertan eros dezaten dinamizatzea, eta lan hori, sektoreka egiten ari da. Osasuna eta edertasunarekin lotutako establezimenduen txanda heldu da orain eta bi astez horien dinamizazioa indartuko du.
Honakoa, hirugarren dinamizazio plana da —sei dinamizazio aurreikusi ditu iniziatibak orotara— eta salmenta gurutzatua bultzatuko du Errenteria-Oreretako osasun eta edertasun esparruan lan egiten duten establezimenduen artean txartel eskaintza erakargarri baten bidez, “15 eurotik gorako salmentek, txartel bat izango dute opari partaide den beste saltoki batean erabiltzeko—azaldu du udalak— Ekonomia zirkularra eta herritarren eta Errenteriako denda ezberdinen arteko dinamizazioa sustatzea da helburua”.
Dinamizazio plan honetan fisioterapia zentroak, hortz klinikak, ortopediak, optikak, ile-apaindegiak, makillaje profesionalak eta estetika zentroak dira partaide, besteak beste. Iraupena txartel kopurua agortu arte izango da, eta gozatzeko epemuga aurtengo abenduaren 31 izango da. 50 dira Bizi Errenteria iniziatibarekin bat egin duten osasun eta edertasun establezimenduak.
Ile apaindegian irakurketaz gozatzeko
Hirugarren dinamizazio kanpainaz gain, beste ekintza bat jarri du martxan udalak Bizi Errenteria Iniziatibaren barruan. Ile-apaindegiak eta liburu dendak batu ditu horretarako. COVID-19ak eragindako osasun larrialdia dela eta, ezinezkoa dute ile apaindegietan aldizkariak izatea. Horri erantzuteko, liburu dendetarako deskontu bat jasoko dute ile apaindegietako bezeroek. %10ekoa da deskontu hori eta Errenteriako Xenpelar, Noski, Rojas eta Mirentxu liburu dendetan izango dute deskontua liburu bat erosteko garaian. Kanpaina hilaren 21etik urriaren 15era arte izango da, eta helburua bertako saltokietan erosteaz gain, kulturaren kontsumoa eta irakurketa zehazki, sustatzea da.
