Badian Bizi taldeko kide bat epaitu dute, Olanori su-hautsa botatzeagatik
2018an Markel Olanori su-hautsa bota ziolako epaitu dute. Elkarretaratzea egin dute auzitegi kanpoan, portuko kutsadura salatzeko.
Hamarnaka lagun elkartu dira epaitegiaren aurrean. Lezoko Badian Bizi Taldeak elkarretaratzea deitu du gaur eguerdian, Donostiako Auzitegiaren aurrean. Taldeko kide bat epaitu dute gaur, eta hari babesa emateko elkartu dira bertan, baita portuak sortzen duen kutsadura salatzeko ere.
2018ko azaroan, Markel Olano ahaldun nagusiak —beste hainbat agintarirekin batera— Herrerako pasabidea inauguratu zuen. Gaur epaitutako ekintzailea hurbildu zitzaion, eta su-hautsa bota zion Olanori. Hiru hilabete lehenago sua piztu zen Lezoko kaian, eta ke toxikoa isuri zuen.
Gaur izan da epaiketa, eta akusazio partikularrak hiru hilabeteko zigor ekonomikoa eskatu du, eguneko 30 euroko isunarekin —guztira 900 euro—. Fiskaltzak, berriz, hilabete bateko zigorra, eguneko hiru euro ordainduta —90 euro—.
Akusatua, “nahiko pozik”
Bistaren ondoren, akusatuak HITZAri adierazpenak egin dizkio. “Nahiko pozik” atera dela ziurtatu du. Aretoan Olano eta bera bakarrik egon direla jakinarazi du, eta bakoitzak bere argudioak plazaratu dituela.
Horrela, akusazio partikularraren arabera, ekintza hura egin izana ezin zitzaion “dohainik” atera, Olanori min emateagatik. “Niri, hala ere, ez zait dohainik atera. Ekintza egin ondoren Portu Agintaritzako kide batek mina eman zidan bizkarrean, eta astebete egon nintzen mugitu ezinik”, esan du gaur epaitu duten lezorrak.
Horrez gain, Olanok bere ohorea gutxietsi zuela salatu du. “Esan zuen ni psikologikoki gaizki zegoen pertsona bat nintzela, eta hori bada ordaintzeko modu bat”, gaineratu du. Azaldu duenez, Olanori “su-hauts gramo batzuk” besterik ez zizkion bota. “Portuaren inguruan bizi garenok tona asko irentsi behar izan ditugu”.
Bestalde, akusazio partikularraren arabera, protesta egiteko beste modu eta tokiak daude, eta erakundeak jarri ditu horren adibide gisa. Ekintzaileak gogorarazi du udal eta Batzar Nagusietan egon izan direla, baina ez dietela kasurik egin.
