[Galeria] 'Ortzimugak' batu ditu
La Yegros eta Ines Osinaga izan ziren atzo taula gainean Atlantiakldiaren musika jaialdia hasteko. Emanaldi bikaina eskaini zuten.
La Yegros Atlantikaldian Atzo hasi zen Atlantikaldia. Egoera berezian heldu da jaialdiaren zazpigarren ekitaldia, musuko, gel hidroalkoholiko eta distantzia fisikoak zorrotz markatuta, baina hala ere, ez dio huts egin kulturari, eta segurtasun neurri guztiak bermatuta parez pare zabaldu dizkio ateak. La Yegros abeslari argentinarrak zabaldu zuen musika jaialdia atzo eta Ines Osinaga izan zuen lagun oholtzan hainbat abestietan. Emanaldi bikaina eskaini zuten.
Ortzimugak leloarekin, emanaldi guztiak Fanderiako tenis pistan kokatuko karpan izango dira, doan, baina gonbidapena ezinbestekoa da. Modu presentzialean, Niessen Kulturgunean banatuko dituzte 10:00etatik 13:00etara eta 17:00etatik 20:00etara, eta online, Atlantikaldiaren webgunearen bidez. Pertsonako bi sarrera eska daitezke.
Aurtengo emanaldiek orain artekoek izan duten ezaugarri bera mantenduko dute: nazioarteko artistak eta bertakoak arituko dira oholtza gainean emanaldi bakarrak sortzeko.
Honakoa musika jaialdia izango da, baina Atlantikaldiak izango ditu beste bi ardatz. Eragileek proposatutako ekintzak kultur agendan txertatuko ditu udalak, eta berdin egingo du sorkuntza prozesuekin; nazioarteko eta bertako artistek elkarlanean sortutakoak programazioan txertatuko ditu, eta urte amaierara arte eskainiko ditu.
Gaur bi kontzertu izango dira Atlantikaldiaren barruan, eta bihar berriz hiru.
Egitaraua
- Gaur, ostirala. 19:00etan, Guillem Roca (Katalunia) eta Afrika Bibang (Euskal Herria). 21:30ean, Arat Kilo & Manani Keita (Frantzia-Mali), Mad Muaselekin batera (Euskal Herria).
- Bihar, larunbata. 12:00etan, Pedro Pastor (Espainia) eta Izaro (Euskal Herria); 19:00etan, Gabacho Maroc (Maroko-Frantzia) eta Ainara Ortega (Euskal Herria); 21:30ean, Che Sudaka (Kolonbia-Argentina-Katalunia), eta Huntza taldeko (Euskal Herria) Josune
Arakistain, Uxue Amonarriz eta Aitor Huizi.
Argazki galeria, Herri Biziarena da, Sakatu hemen ikusteko; bideoa, berriz, Iñaki Queralt Coira @inaxok zabaldu du twitterren.
— Iñaki Queralt Coira (@inaxo) September 24, 2020
