Gurutze Gorriaren Osasunaren Sustapena saria jaso du Fernando Lopetegi Urangak
Bizilagunen komunitatean egiten duen ekarpenarengatik, elkartasuna eta giro zoriontsua sortzeagatik atariko bizilagunen artean, aitortza jaso du Fernando Lopetegi Urangak.
Jose Antonio Fernandez eta Fernando Lopetegi, gaurko omendua. Bizilagunen komunitatean egiten duen ekarpenarengatik, elkartasuna eta giro zoriontsua sortzeagatik atariko bizilagunen artean, aitortza jaso du Fernando Lopetegi Urangak. Errenteria-Oreretako Gurutze Gorriak Lopetegiri eskaini dio Osasunaren Sustapena saria. Gaur eguerdian egin dute diploma emate ekitaldia, Iztietako Gurekin Auzo elkartearen egoitzan. Jose Antonio Fernandez Errenteriako Gurutze Gorriko presidenteak hartu du hitza ekitaldian. Xumea izan da eta Lopetegiren hurbilekoak, zein ataria partekatzen duten auzokide batzuk izan ditu lagun aitortza jasotzeko unean. Modu ikusezinean lanean ari diren pertsonen egitekoa agerian jarri eta aitortzeko beharra aldarrikatu du Fernandezek, “elkartasunez bere laguntza behar dutenei eskaintzen dieten milaka bizilagunak ordezkatu ditu gaur hemen Lopetegik, eta anonimoa baina ikaragarria den lan hori agerian jarri nahi du Gurutze Gorriak gaur hemen”.
Atari Solidarioa Gipuzkoako Gurutze Gorriak duela hamahiru urte abian jarritako programa ekarri du gogora Fernandezek: “Gipuzkoako bizilagun komunitateetan auzokideen arteko elkarbizitza egokia, giro ona, eta beharra dutenei laguntzea sustatzen du programa horrek. Horren adibide dugu Fernando (Lopetegi)”. Ez dira boluntarioak, ez dira inongo taldeko boluntarioak, baina kezka dute, ardura, ondoan, behean edo goiko pisuan bizi den auzokidearekin. Haien arazoak entzuten, behar dutenean laguntzen, eta bizitza eramangarriagoa baita alaiagoa ere egiten saiatzen dira. Halako hamarnaka dira, ikusezina da beren lana.
Maider Gonzalez Gipuzkoako Gurutze Gorriaren arduraduna ere izan da gaurko ekitaldian. Gogora ekarri du bizilagunen osasunaren sustapena modu desinteresatuan egiteagatik banatzen duten sariak bigarren ekinaldia duela aurtengoa. Iaz Santi eta Maialenek jaso zuten aitortza hori, “zoriontasuna da ertsonen ongizatearen arrazoi nagusietako bat, eta bi erraldoiek ikaragarri zoriontsu egiten dituzte herriko haurrak”.
Lopetegiren lana aitortuta aurten, Atari Solidarioa programari indarra eman nahi izan dio Gurutze Gorriak, “auzotasun ona, garai batean gure aiton.amonek zuten hura berreskuratzeko bidean eta haur eta gazteei horretarako eredu egokiak eskaintzeko. Familia eredu ezberdinak, lanbide ezberdinak, adinak, naziotasunak… gizartean dagoen aniztasun hori guztia bizilagunen atarian batzen denean eta elkarbizitza egokia bada, osasun iturria izango da aniztasun hori. Fernandok hori egiten du, bere bizilagun komunitatean giro atsegina, zoriontsua sortzeko ekarpena egiten du, eta beharra duten bizilagunei laguntzen saiatzen da; eredu hori zabaldu behar dugu haur eta gazteengan eragina izan dezan”.
Koronabirusari ere egin dio erreferentzia, “gauza txar asko ekarri dizkigu eta ekarriko dizkigu, baina onen at ere utzi digu. Lehen unetik, etxean osasun arrazoiengatik gelditu behar izan zuten bizilagunak laguntzeko sare komunitarioak sortu ziren, erosketa egin, botikak erosi, hondakinak atera… hori entrenamendu zelaia da haur eta gazteentzat, eta ikaragarri garrantzitsua mantentzea”.
Bizilagunak zaintzen dituen atari batek, auzo solidario bat sortzen duela, eta horrek komunitate solidarioa nabarmendu du azkenik Gonzalezek, “herri solidario bat eraikitzeko, azkenik”.
Lopetegik bildutako lagunen txalo eta esker on hitz artean jaso du gaur aitortza.
