Iheslariak hartzeko eta integratzeko harrera planari eusteko konpromisoa berretsi du udalak
Moriako pertsona errefuxiatuen eremuan gertatutako sutea dela eta, Pasaiako Udalak Espainiako Gobernuari eta Europako erakundeei eskatu die har ditzatela premiazko neurriak krisi humanitarioari erantzun aktiboa emateko.
Janari banaketa, Moriako errefuxiatuen esparruak su hartu ostean. Argazkia: Zaporeak 
Pasaiako Udalak, EH Bilduk eta PSE-EEke egindako proposamenari men eginez, adierazpen instituzionala egin du Moriako pertsona errefuxiatuen eremuan gertatutako sutea dela eta. Idazki horretan, udal gobernuko alderdi guztiek iheslariekiko elkartasuna agertu dute, haien eskubideen urraketa sistematikoaren eta jasaten duten muturreko kalteberatasun- eta babesgabezia-egoeraren aurrean.
Udalak, Eusko Jaurlaritzarekin eta Gipuzkoako Foru Aldundiarekin bat, iheslariak hartzeko eta integratzeko harrera planari eusteko konpromisoa berretsi nahi izan du. Halaber, Espainiako Gobernuari eta Europako erakundeei eskatu die har ditzatela premiazko neurriak krisi humanitario honi erantzun aktiboa emateko.
Zaporeakeko kideek gaur eta bihar (hilak 25 eta 26) Euskal Herri guztian zehar deituriko janari bilketa nazionalean parte hartzeko deia ere egin die udalak pasaitarrei.
