Pasaiako Udala kezkatuta dago ekintza bandalikoen "kopuru izugarria" dela eta
Kalteen konponketek 44.000 euroko gastua eragin dute, azken urtean, kutxa publikoetan. Alkateak pasaitarrei eskatu die horrelako ekintzak Udaltzaingoan salatzeko.
Pasai Antxoko gaztelekua. Lokala, lehen, herriko gaztetxea zen. 
Pasaiako Udalak, komunikatu publiko baten bitartez, legealdiko lehen urtean zehar herrian izan diren ekintza bandalikoen kopuruagatik kezkatuta dagoela iragarri du. Denbora tarte horretan jazo diren kalteen konponketek (guztira 500 baino gehiago zenbatu dira) 44.000 euro inguruko gastua eragin dute kutxa publikoetan “pasaitar guztiok erabiltzeko eta disfrutatzeko elementuak konpondu behar izan direlako”.
Izaskun Gomezek adierazi du Covid-19agatik deklaratu zen larrialdi-egoeraren ondorioz herritarrak hiru hilabetez etxeratuta egon diren arren, ekintza bandalikoen kopurua izugarria izan dela azken urtean. Suntsiketa horiek alkatea bereziki kezkatzen dute: “Guztion interesen aurkakoak direlako, eta Pasaiako diru kutxarentzako ikaragarrizko gastua dakartelako”. Egoeraren aurrean, Gomezek pasaitarrei erantzukizunez jokatzeko eskatu die, eta halako ekintzak (eta ekintzen egileak) Udaltzaingoan salatzeko.
