Euskal organo jolerik onenarekin omenduko dute Azkue
Aurten ez da kontzerturik egingo Oiartzunen, Cavaille-Coll organoaren mantenu lanak egiten ari direlako. Irunen izango da kontzertua.
Asteburu honetan egingo da Jose Manuel Azkue zenaren omenezko memoriala, zazpigarren aldiz. Egungo euskal organo jolerik onenetakoa —onena ez bada— gonbidatuko dute Oiartzungo Organozaleen Elkartekoek: Thomas Ospital (Aiherra, Baxe Nafarroa, 1990).
Ez da protagonista bakarra izango. Maialen Lujanbio eta Uxue Alberdi bertsolariek ere beren ekarpena egingo diote Azkue Memorialari. Antolatzaileek adierazi dutenez, entseguetan ikusi dute saio “ausarta eta entzungarria” izango dela.
Aurreko urteetan bezala, bi kontzertu emango dituzte, bata Irunen eta bestea Hondarribian. Oiartzunen ez da saiorik egongo, Cavaille-Coll organoa mantenu lanetan baitago.
Hondarribiko kontzertua alde zaharreko parrokian izango da, larunbatean —hilak 3—, 19:00etan hasita. Irungoa, berriz, hurrengo egunean izango da, ordu berean. Junkal elizan arituko dira Ospital, Lujanbio eta Alberdi.
Berritze prozesua
Oiartzungo parrokiako organoa Cavaille-Coll etxearen lehenengoetakoa da, eta Iberiar penintsulako lehenengoa (1843 inguruan). Azken berrikuspena 1999an egin zuten, eta unean uneko konponketak eta afinazioak egin zaizkio.
Arazoa batzuk sortu zaizkio, organozaleen arabera: “Organoaren zati nagusia mekanikoa duenez gero, makineria oso jorratua dauka. Tutu batzuetan lepra azaldu zaio. Denboraldiari aurre egiteko, bi-hiru afinazio/konponketa egin behar izan zaizkio urtero”.
Gainera, erabilera handitzeagatik, matxura gero eta gehiago izan ditu. Horrela, aurtengo eta iazko kontzertuetan arazoren bat izan zuten organistek.
Gainera, irailaren 6tik 13ra bitartean desmuntatu zuten organoa, elizan egondako arazo bat dela eta. Artesi bat azaldu da parrokian, eta organoa bera ez kaltetzeko desmuntatzea erabaki dute.
“Frantziako Michel Jurine etxeak egin du desmuntatze lana. Zati guziak ongi sailkatu ondoren, koruaren azpiko kaperan gordeak izan dira, berritzearen hurrengo fasea martxan ipini artean”, adierazi dute.
