Landa eremuan Internet konexio zailtasunak dituzten ikasleentzako
Internet konexiorik ez edo kaxkarra duten ikasleek Manuel Lekuona bibliotekako ordenagailuak erabili ahal izango dituzte ikasturte honetan.
Oiartzungo landa eremuan Interneterako konexioa jasotzeko arazoak daude. Oiartzungo Udala horren jakitun da. Horregatik, Interneta jasotzeko aukerarik ez duten edo jasotzeko zailtasunak dituzten ikasleei zerbitzua eskainiko dio udalak.
Udalak erabaki hori hartzearen arrazoia azaldu du: “Ikasturte honetan eskolak hartzeko eredua aldatu dute goi mailako ikasketak eskaintzen dituzten ikastetxe batzuek”. Horregatik, egoera horretan dauden ikasleek Manuel Lekuona bibliotekako ganbara erabiltzeko aukera izango dute.
Erabiltzaile izan nahi dutenek aldez aurretik zerbitzua erabiltzeko eskaera bidali beharko dute helbide elektroniko bidez. Bakoitzaren datu pertsonalez gain (izen-abizenak, helbidea eta telefono zenbakia), zerbitzua erabiltzeko beharra duen eskola-ordutegia jakinarazi beharko dute bibliotekako ganbaran eskainiko duten zerbitzua erabili nahi dutenek.
