Udalak hainbat mantenu lan egin ditu herriko auzoetan
Herriko bost auzotan lanak egin dituzte, hainbat azpiegituren egoera hobetzeko. Etorkizunean antzeko lan gehiago egingo dituzte.
Txukundu duten Karrikako jolas parkeetako bat.
Oiartzungo Udalak hainbat mantenu eta margotze lan egin ditu herriko auzoetan. Erakundeak jakinarazi duenez, margotze lan horietako askok mugikortasunarekin dute harremana: aparkalekuak, oinezkoentzako pasabide seguruak…
Auzoz auzo egindakoak zerrendatu ditu udalak. Elizalde auzoan, Elorsoro kiroldegian elbarrientzako aparkalekuak margotu dituzte berriro. Horrez gain, Euskal Herria plazan ere motorrentzako hemeretzi aparkaleku markatu zein bizikletak uzteko tokia berrantolatu dituzte. Elizalde eskolako larrialdi irteerako eskailerak ere margotu dituzte.
Iturriotzi dagokionez, Ozentzio kaleko 26 eta 28 zenbakien plazako barandak zuriz margotu dituzte.
Karrikan, berriz, Xabaleko plazan oinezkoentzako pasabideak eta espaloiak markatu dituzte, ikusgarritasuna eman eta mugikortasuna eta segurtasuna hobetze aldera. Auzoko bi jolas parkeen garbiketa sakona egin dute halaber.
Karrikako jolas parkeak ez dira garbitu dituzten toki bakarrak izan. Gurutzeko Bizardia plazan ere garbiketa lanak egin dituzte, bai jolas parkean, baita eserlekuetan ere. Banku horiek lixatu eta margotu ere egin dituzte.
Arraguako Makarraztegi industriagaunean, aparkalekuak eta pasabideak markatu dituzte.
Epe motz eta ertainean, berriz, antzeko mantenu lan gehiago egingo dituzte. Honako auzoetan izango dira: Arraguan, Elizalden, Ergoienen, Gurutzen eta Ugaldetxon.
