Aldura eta Urdaburura euskal presoak etxeratzeko eskatzeko
Sarek herritar guztiak deitu ditu parte hartzera, giza eskubideen, bakearen, konponbidearen eta elkarbizitzaren alde, "urrats bakoitza da ezinbesteko".
Urriaren 3an Euskal Herriko 650 mendi tontor igoko dituzte hamarnaka lagunek Izan Bidea iniziatibaren barruan. Errenteria-Oreretari, bi mendi egokitu zaizkio dinamika horren harira, Aldura eta Urdaburu hain zuen ere. Helburua, euskal presoen eskubideen alde egitea, eta horien etxeratzea eskatzea.
Sarek herritar guztiak deitu ditu parte hartzera, giza eskubideen, bakearen, konponbidearen eta elkarbizitzaren alde, “urrats bakoitza da ezinbesteko”.
Parte hartzeko izena eman behar da hemen.
Aldurara zein Udaburura igotzeko 08:30ean egin dute hitzordua Herriko Plazan, eta 09:30ean Susperregin. Bukatu ondoren ekitaldia eta hamaiketakoa egingo dute elkarrekin Malbazarren. Izan Bidea dinamikaren kamiseta urdina jantzita eramateko eskatu die parte hartzaileei Sare Herritarrak.
Hitzaldia
Mendi irteeraren aurretik, beste hitzordu bat finkatu du herritarrekin Sarek. Pandemia kartzeletan nola bizitzen ari diren, zein eragina izaten ari den presoengan zein haien senide eta lagunengan aztertuko dute bihar, eta hausnarketarako bidea zabaldu, Sare Herritarrak antolatu duen hitzaldiarekin.
Merkatuzarrek hartuko du hitzaldi hori eta bertan arituko dira, hizlari, Martin Iriberri Martuteneko kapilaua, Urtzi Errazkin Etxerat elkarteko bozeramailea, eta Libertad Frances Salhaketako kidea. Moderatzaile lanetan, berriz, Arantxa Urbe arituko da.
COVID-19aren osasun larrialdiaren harira abian diren segurtasun eta higiene protokoloak beteko dira hitzaldian, eta antolatzaileek gogorarazi dute, ezinbestekoa dela muxukoa soinean izatea hitzaldian.
19:00etan hasiko da hitzaldia.
