Ongizate sistema publikoa aldarrikatu dute adinekoen egunaren bezperatan
Urriak 1, Adinekoen Nazioarteko Eguna, berezia izango da aurten. COVID-19ak baldintzatuta iritsi da, eta pentsiodun eta jubilatuen aldarrikapenak zentzu are handiagoa hartu dutela, premia larriagoa dela ari da agerian uzten.
Jubilatu eta pentsionistak hilero-hilero mobilizatzen dira Duintasunak deituta. Urriak 1, Adinekoen Nazioarteko Eguna, berezia izango da aurten. COVID-19ak baldintzatuta iritsi da, eta pentsiodun eta jubilatuen aldarrikapenak zentzu are handiagoa hartu dutela, premia larriagoa dela ari da agerian uzten. Horren harira, Gipuzkoako adinekoen eta Pentsiodunen Elkarteen Plataformak GAPEP, adierazpena egin du publiko, eta bat egin du azken horrekin Duintasuna elkarteak.
COVID-19a heldu zenetik, ongizate sistema indartsu bat izatearen garrantzia agerian gelditu dela diote, “izan ere, osasunik gabe, egoitza onik gabe, mendekotasuna artatzeko zerbitzu egokirik gabe, eta babesik gabe gaude adineko pertsonak, ikusi den bezala. Pandemiak ongizate erakunde publikoen garrantzia nabarmendu du, enpresa pribatuak ez baitira ordezkatzeko gai”. Balorazio horrek, gainera, pentsio publikoen garrantzia aitortzera ere eraman dituela nabarmendu dute adineko eta pentsiodunek.
Ehunka eta ehunka dira plataforma horren esanetan pobrezia betean bizi diren adinekoak: hilabete amaierara heltzeko arazoak, alokairua, argia, gasa eta bestelakoak ordaindu ezin dituzten adineko eta pentsiodun ugari dago. Horri aurre egin eta zahartzaro duina bermatzeko pentsioen sistema publikoa blindatzea eskatu dute eta 1080 euroko gutxieneko pentsioa bermatzea. Pentsio publikoak blindatzea ez da egin duten eskaera bakarra, osasun publikoa bermatzea da beste eskaeretako bat, eta horretarako, beharrezkoak diren giza baliabide eta baliabide materialak ziurtatzea eskatu diete erakundeei, osasun arreta publikoa bermatzeko.
Etxean zein egoitzetan zainketa zerbitzu publikoa ere aldarrikatu dute; hori ere, ezinbesteko baldintzen zerrenda barruan sortu dute zahartzaro duina bermatuko bazaie: “Publikoa eta komuna den guztiaren defentsa egiten dugu”. Pertsona zentroan jarri beharra nabarmendu dute, bestalde, “horrek zaintza eredua aldatzea ekarriko duelako, eta horretarako, egoitzei giza baliabide eta baliabide material handiagoak eman behar zaizkie pertsonen segurtasuna eta duintasuna bermatzeko”.
Beste eskaera bat: berdintasun politikak ezartzea adineko pertsonen kolektiboan ere. Eta horri beste ezinbesteko eskakizun sorta erantsi diote adinekoen osasuna eta bizitza zaintzeko: “Desagerraraztea diskriminazioa eta tratu txar fisikoa, emozionala eta arduragabekeria zainketan, baita desio ez den bakardadea ere”.
Elkartasuna adierazi die azkenik plataformak adineko pertsona ahulenei, “eskatzen dugu gure giza eskubideak errespetatzea, bizitza duina bermatzea bizitza amaierara arte. adinekook gizarteari egiten diogun ekarpenari aitortza egin nahi diogu, eta adierazi nahi dugu egiten ari garen borrokak zentzu handia duela gure osasunerako eta bizitzarako”.
Horren harira, eta udako etenaldiaren ostean, astelehenean berriro ere kalera aterako direla azaldu du Duintasunak, pentsiodun eta jubilatuen eskubideen alde, bizitza duinaren alde eta pentsio publikoen alde. Hitzordua, 11:00etan Herriko Plazan.
