Pobrezia ez dute berdin ulertzen Pasaiako udalbatzako alderdi guztiek
Urriaren 17an izango den pobrezia desagerrarazteko nazioarteko eguna dela-eta bi mozio aurkeztu dira Pasaiako Udalean. Alderdiak ez dira gai izan akordio batera heltzeko.
Pasaiako udalbatza, atzo izan zen ohiko bilkuran, ez zen gai adostasun batera heltzeko. 
Atzo egin zen ohiko udalbatzarrean hainbat neurri onartu ziren aho batez, haien artean 2021. urteko tasak izoztea, baina egon zen alde guztien arteko adostasuna lortzea ezinezkoa izan zen gai bat, urriaren 17an izango den pobrezia desagerrarazteko nazioarteko egunarekin lotutakoa, zehazki. Data hori dela eta EH Bildu taldeak mozio bat aurkeztu zuen, eta EAJk eta PSOE-EEk elkarlanean beste bat; bi taldeek elkarren proposamenei ezezko botoa eman zioten, Podemos, aldiz, bien alde agertu zen.
EH Bilduko zinegotzi den Iraitz Pazosek euren proposamena aurkeztu zuen, COVID-19aren eraginez hainbat herritarren bizi baldintzek txarrera egin dutela nabarmenduz eta horren isla diren datuak aurkeztuz. Pazosek argi utzi nahi izan zuen EH Bilduk pobrezia arazo publiko gisa ulertzen duela, “askotan sinetsarazi nahi digutelako pobrezia arazo pribatua dela, edo norberarena”, eta arazo publikoa den heinean, erantzun politikoa eta beraz, adostutakoa, eman behar zaiola uste dute. Udalari urgentziazko hainbat konpromiso har ditzala eskatu zion zinegotziak, egoera larrian dauden pertsonei lagun diezaien.
EAJko Nahikari Oterminek eta PSE-EEko Itziar Barraganek aurkeztu zuten, ondoren, bi taldeen mozio alternatiboa, milioika pertsonek bizi duten muturreko pobrezia eskandalu morala dela gailenduz: “Eta, gainera, gure gizartearentzako ere hau ez dela arrotza”. Euren mozioak hiru ildo nagusi ditu: Pobrezia errotik kentzeko konpromisoa, politika publikoak indartzea eta gizarte zerbitzuak nahiz arreta babesa sustatzea.
Ahal Dugu taldeko Julen Rodriguez talde guztien arteko akordio bat lortzeko ezintasunaz penatu zen: “Guk bi mozioei baiezkoa emango diegu, horrelako gai bati buruz ari garenean ezin garelako kontra egon, baina kritika bat egin nahiko nieke alderdi guztiei, gurea barne, mozio komun bat gauzatu ez izanagatik; hau bezalako gai serioetan akordioetara heltzeko gai izan behar dugu”. Gainontzeko alderdiek eurena babestu zuten, besteen proposamenarekin guztiz ados ez egonagatik kontrako botoa emanez.
