Hitzak sortuz "hizteria kolektiboa" hedatuko dute Oiartzunen
Hitzen Lihoa iniziatibak irudimena erabiltzera animatu ditu oiartzuarrak, Hizteria Kolektiboa proposamenarekin. Hitzak asmatzera animatu dituzte.
Hitzen Lihoa iniziatiba hirugarren aldiz egingo dute aurten. Abenduan izango dela iragarri dute antolatzaileek. Hala ere, egitarauko ezer aurreratu baino lehen, beste proposamen bat egingo diete oiartzuarrei: Hizteria kolektiboa. Hitzen Lihoak eta Txakur Gorriak elkarlanean sortu dute udazkenerako proposamena.
Ez dadila inor beldurtu. Oiartzuarrek beren irudimenari zukua ateratzeko proposamen sortzailea izango da Hizteria kolektiboa. Hiru urrats izango dituela jakinarazi dute:
- Hitza sortu (adibidez, apaizmena).
- Ondoren, beste batek sortutako hitzari definizio bat asmatu.
- Azkenik, hitz asmatu horietako bat irudikatu.
Parte hartu nahi dutenek hilaren 12a baino lehen bidali beharko dituzte beren proposamenak, e-posta bidez. Behin bidalita, Hitzen Lihoako kideek xehetasun gehiago emango dizkiete parte hartzaileei.