Sarri, Pessoa, argazkiak, argigramak eta baserriak, 21 Aulkiren osagaiak
Ostiralean hasiko da 21 Aulki, irakurketa dramatizatu batekin. Larunbatean emakumeentzako argazki saioa egingo dute, Nagore Legarretarekin.
21 Aulkik Ehuntzen izango du epizentroa. Ostiralean hasiko da 21 Aulki dinamika kulturala, Metrokoadrokaren eskutik. Irakurketa dramatizatu batekin hasiko da: Mikel Antzak Loraldirako idatzitako Pessoak atera zuen Sarrionandia kartzelatik antzezlanaren irakurketa dramatizatua egingo dute.
Erika Olaizola eta Ainhoa Alberdi izango dira aktoreak, eta kanpo-begiradaren ardura izan dute Antzak berak eta Idoia Beratarbidek. Ekitaldi hori, dinamikako gainontzekoak ez bezala, udaletxeko pleno aretoan izango da. 19:00etan hasiko da.
Legarretarekin, bi saio
Datorren larunbaterako, hilak 17, Nagore Legarreta argazkilaria gonbidatuko dute. Gorputzen errebuelta izeneko argazki saioa antolatu du. “Gorputzen ezinegona, konpresioa, zabaldu eta ahazteko nahiaren inguruko lanak garatzen dabil azken urteetan”, adierazi dutenez.
19:00etan geratuko dira agertu nahi duten emakumeak, Ehuntze espazioan (Beheko Plazan). Afari-merienda egin ondoren, basora joango dira, argazki saioa biluzik egitera.
Ondoren, Legarretak argazkiak errebelatuko ditu, eta irudi-artefaktu poetikoak sortuko ditu, anonimotasuna gordeta. Parte hartzaileek beren irudia jasoko dute trukean.
Baserria, laborategi
Hurrengo ostegunera arteko etena izango du 21 Aulki dinamikak. Hilaren 22an, Onintza Etxebeste ikerlari eta artistak tailer teoriko-praktikoa eskainiko du. Baserria gai bezala hartuko du, eta ikerketa artistiko eta teorikotik abiatuta, baserria laborategi bilakatzeko saioa izango da.
“Bertan”, azaldu du Etxebestek berak, “elementuaren dimentsioak irakurri ahala joango gara jatorria xehatzen, kultur nortasunaren kutxa beltzak irekitzen, geruzetan murgiltzen, esku hartuz eta mugiaraziz geure ikuspegiak, elkarrekin sortuz baserriaren irudi posibleak”.
Tailer hori ere Ehuntzen izango da, 19:00etan hasita.
Argigrama lantegiak
Hurrengo ostiralean —hilak 23— Nagore Legarreta bueltatuko da Ehuntzera. 18:00etan hasita, argigrama tailerra eskainiko du. Argazki kamerarik gabeko argazkiak egingo dituzte: argazki paper analogikoa, errebelatzeko kimikoak, pintzelak… eta eskura duten edozer erabiliko dute.
Argazkiak sortzerakoan argiak duen garrantzia jabetuko dira. “Prozesuan momentuak ekartzen duenaz gozatzen ikasiko dugu”, aurreratu dute.
Izena emateko bi bide egongo dira. Alde batetik, 652 70 15 53 telefono zenbakira dei dateke. Bestetik, Ehuntzeren e-posta helbidera idatz daiteke.
