Piraguismoa, lehen aldiz, Pasaiako eskola kiroleko eskaintzan
Pasa den larunbatean ehun gazte inguru atera ziren uretara euren piraguetan. Bigarren txanda datorren larunbatean egingo dute.
Pasa den larunbateko txanda bat, Hospitalillo kaian. 
Pasaia Kirol Badiak martxan jarri zituen joan den larunbatean (hilak 17) eskola kirolaren egitasmoen barruan antolatzen dituen larunbatetako kirol-ekitaldiak, zenbait modalitate gazteen artean ezagutzera emateko asmoz. Aurten lehen aldiz sartu dute piraguismoa eskaintzan, Pasaia Kayak taldeari esleituz zerbitzua.
Lehen asteburu hartan ehun haur inguruk (LH3 eta LH6 mailen artean) parte hartu zuten, lau txandatan banatuta, -aldi bakoitzean bataz beste 25 haur egonik. Antolatzaileek iniziatibarekiko gogobetetzea adierazi dute: “Arrakasta itzela izan zuen ekimenak eta pozarren bukatu zuten guztiek, eguraldia lagun”.
Larunbat honetan (hilak 24) egingo dute bigarren irteera uretara, oraingoan ere lau txandatan, 9:00etatik 13:00a arte. Horrez gain, astean zeharreko eskaintza ere jarri du martxan Pasaia Kayakek eskola kiroleko haurrentzat: hilaren 26tik hasita PKBrekin batera arratsaldeko ikastaroak egingo dituzte, ordubete astelehen eta asteazkenean, eta bi ordu astearte eta ostegunetan.
