COVID-19: Errenteria-Orereta, eremu gorrira iristear
Oarsoaldeko herri populatuenean 26 positibo gehiago atzeman ziren atzo, eta 100.000 biztanleko tasa 478,31raino igo da. Zonalde gorria 500ean hasten da.
Pasaian eta Lezon COVID-19 positiboek nabarmen egin zuten gora atzo: Pasaian hamalau kasu gehiago zenbatu ziren, bost Lezon. Horrek eragin du euren azken 14 egunetako 100.000 tasek gora egin dutela berriz ere, nabarmen gainera. Errenteria-Orereta dago orain zonalde gorri horretara (tasan 500dik gorakoena) iristeko zorian: atzo koronabirusagatik 26 positibo gehiago izan ziren, eta tasa 478,31ra iritsi da. Oiartzunek, aldi berean, 400eko zifra gainditu du atzoko bost positiboengatik.
Koronabirusaren eragina mugatzeko 14.144 PCR proba egin zituzten atzo Gipuzkoan, Araban eta Bizkaian. Horietatik 1.207k eman zuten positibo, %8,5ak.
Horrela dago Oarsoaldeko egoera, azken hamalau eguneko 100.000 biztanleko tasari dagokionez, Oarsoaldean (atzoko datuak). Zenbaki hori 500etik gorakoa bada, Jaurlaritzak erabaki dezake herriei atzo erabakitako neurriak eta gomendioak ezartzea:
- Lezo: 819,40 (asteazkenean, 737,46).
- Pasaia: 622,34 (asteazkenean, 556,52).
- Errenteria-Orereta: 478,31 (asteazkenean, 430,98).
- Oiartzun: 425,08 (asteazkenean, 376,78).
- Gipuzkoako batez bestekoa: 626,33 (asteazkenean, 576,97). Gipuzkoan 23 udalerri daude eremu gorrian.
Osasun Sailak datu horiek eta beste asko eman ditu gaur zabaldu duen txostenean. Sakatu beheko esteka hori osotasunean jasotzeko.
