Margotze eta mantenu lanak egin dituzte herriko lau auzotan
Elizalde, Ergoien, Gurutze eta Ugaldetxo auzoetan hainbat lan egin dituzte. Gehienek trafikoarekin eta mugikortasunarekin dute zerikusia.
Arritxulora joateko irisgarritasuna hobetu dute. Oiartzungo Udalak adierazi duenez, margotze eta mantenu lanak egiten jarraitzen du. Oraingo honetan, lau auzotan izan dira: Elizalde, Ergoien, Gurutze eta Ugaldetxon. Lan gehienek mugikortasunarekin edota trafikoarekin dute zerikusia.
Gurutzen, aparkalekuan aparkatzeko tokiak berriz markatu dira (auto, autobus eta motorren eremuak ongi zehaztuz) eta ezgaitasunen bat dutenentzako hiru aparkaleku atondu dira eremuetako batean.
Ergoien auzoari dagokionez, Arritxulo aterpetxearen inguruan egin dituzte margotze lanak. Oinezkoentzako pasabideak markatu dituzte, baita ibilgailuentzako eremua ere. Arritxuloko sarreran aparkatzeko debekua jarri da, bertan ibilgailuak uztean irisgarritasuna oztopatzen delako.
Ugaldetxon, berriz, auzoko zubiko —Matteo ondoan— barandak margotu dituzte udaleko langileek.
Hilerri ingurua da esku-hartzea egin duten laugarren eremua. Pixkanaka hilerriko koadranteak hormigoiarekin txukuntzen ari dira; lau koadrante dira eta orain egin dutena bigarrena da. Helburu nagusia mantenu lanak erraztea dela esan dute.
Azaroaren 1era begira, kanposantuko irteerako atean ere konponketak egiten ari da udala. Egun horretan joan-etorri asko egon ohi dira, eta prest eduki nahi dute ordurako.
(Argazkiak udalarenak dira).
-
- Gurutzeko aparkalekua.
-
- Ugaldetxoko zubia.
-
- Hilerriko koadranteak.
