Motibazio politikoko indarkeriari buruzko mozioa aztertuko dute plenoan
Urriari dagokion ohiko plenoa hilaren 28an egingo dute. Zinegotziek hamahiru puntuko gai zerrenda izango dute aztertzeko.
Iraileko plenoko irudia.
Hilaren 28a hilabeteko azkeneko asteazkena izango denez, Oiartzungo Udalbatzak plenoa egingo du, 19:00etan hasita. Hamahiru puntu izango ditu.
Horietako bat mozioa izango da, EH Bilduk eramandakoa. Egiari Zor fundazioak motibazio politikoko indarkeriagatik giza eskubideen urraketak jasan dituzten biktimei laguntzeko, erreparatzeko eta aitortza egiteko proposamena jasotzen du.
Antzeko gaia jorratuko dute beste puntu batean. 1936 urtetik gaur egun arte Oiartzunen egondao giza eskubideen urraketen ikerketa egiteko udalak Aranzadi Zientzia Elkartearekin hitzarmena sinatzeko proposamena izango da.
Hirigintzako hainbat puntu ere aztertuko dituzte. Tartean egongo da Mendiburu 14 eraikin balioanitzari buruzko puntua; obren etenaldia luzatzearen berri emango dute.
Gai zerrenda osoa ikusteko, egin klik esteka honetan.
