'Altxa!' ikuskizuna ikusteko txartelak salgai jarriko dituzte bihar
Gure Eskuk eta beste 23 eragilek, Hamaika Gara dinamikaren barruan, ekitaldia antolatu du larunbaterako. Online jarraitzeko aukera egongo da.
Hamaika Gara iniziatiba osatzen dute Gure Eskuk eta beste 23 gizarte eragilek. Larunbaterako ekitaldia antolatu dute, online ikusteko. 18:00etan hasiko da.
Altxa! kultur ekitaldia egingo dute lehendabizi. Amancay Gaztañagak zuzenduko du, Gotzon Barandiaranen gidoiarekin. Iraia Elias, Erika Olaizola eta Laura Penagos aktoreek hartuko dute parte, baita Amets Arzallus bertsolariak eta Eñaut Elorrietak ere. Dupla musika taldeak ere bere tartea izango du.
Kultur ikuskizunaren ondoren, ekitaldi politikoaren txanda izango da.
Hori ikusteko bonuak salduko dituzte, bost euroren truke. Ikusteko aukera izateaz gain, Hamaika Gara dinamikaren eskumuturrekoa jasoko dute. Bonua lortzeko aukera egongo da bihar arratsaldean zein etzi goizean. Fermiñenen egongo dira: bihar, 18:00etatik 20:00etara, eta etzi, 11:00etatik 14:00etara.
