Iñaki Bilbaoren borroka babestuko dute gaur
Elkarretaratzera deitu dute euskal presoak 50 egun bete dituenean gose eta komunikazio greban. Bere egoera larria da.
Iñaki Bilbao Txikito euskal presoak 50 egun bete ditu gaur gose eta komunikazio greban. Independentzia eta sozialismoa helburu hasi zuen protesta, eta horiek lortu arte protestarekin jarraitzeko asmoa berretsi du Bilbaok. Gose greban 20 egun bete zituenean, indarrez atera zuten erietxera eta jatera derrigortu. Espetxera itzuli zutenean, protestarekin jarraitu zuen Bilbaok, eta orain, hilaren 19az geroztik ospitalean da berriz; ez dago haren egoeraren gaineko berririk. Puerto III ( Cadiz, Andaluzia, Espainia) espetxean dute eta 36 urte bete ditu preso.
Euskal presoak hasitako borroka babestu eta elkartasuna adierazteko berari zein gainontzeko euskal presoei ere elkarretaratzera deitu du herritar talde batek gaur arratsaldean, 19:00etan Herriko Plazan. Bilbaoren egoera oso larria dela salatuko dute bertaratzen direnek.
