Eskola Kirolak aurrera jarraitzen du, lehiarik gabe oraingoz
Eusko Jaurlaritzak hainbat jarraibide zehaztu ditu jarduera horietarako. Piraguismoak ohiko martxan jarraitzen du, eta baita gainontzeko entrenamenduek ere.
Piraguismoko astearteko bigarren txandako taldea. 
“Izan ditugun gorabehera guztiekin, munduak aurrera darrai”, poztu da Txema Yarza, Pasaia Kayak Kirol Klubeko kide, “eta Eskola Kirola eta horrekin lotutako Eskolaz Kanpoko Kirol Jarduerak ere bai”.
Zailtasunak zailtasun, Gipuzkoako Foru Aldundiak baimena eman dio Pasaiako Udalari Pasaia Kirol Badiaren bidez antolatutako aste osoko jarduera aurrera ateratzeko, eta horrekin batera, Oarsoaldeko gainontzeko udalei ere, jakina.
Gauzak horrela, Oarsoaldeko ikastetxeetako ikasleek piraguismoa ezagutzeko aukera izaten jarraituko dute astelehenetik ostegunera, ordubeteko saio batekin astelehen eta asteazkenean, eta ordubeteko bi saiorekin astearte eta ostegunean. Ikastetxe askotako gazteak ari dira jardueretan parte hartzen.
Piraguismoarekin batera, Eskola Kirolaren barruan antolatutako beste jarduerak ere martxan dira. Honakoak dira Eusko Jaurlaritzak horietarako zehaztu dituen jarraibideak:
- Taldekako zein bakarkako Eskola kiroleko entrenamenduak baimentzen dira.
- Eskola-kiroleko lehiaketa bertan behera geratzen da (2007an eta ondoren jaiotakoetan).
- Taldeka egiten diren jardueretan eta/edo entrenamenduetan:
- Ikastetxeetan ematen diren jarduerek eta/edo entrenamenduek, ikastetxeetako protokoloak bete beharko dituzte.
- Gainontzeko instalakuntza publiko zein pribatuan, gehienez ere 6 lagun arituko dira talde bakoitzean; talde bat baino gehiago egon daiteke aldi berean; ezin izango da talde edo pertsonen arteko harremanik izan, eta talde bat baino gehiagoko arduradun bat egon daiteke.
