Albaolak pasaitarrei irekiko dizkie bere ateak, doan
Larunbat goizean dohainik bisitatzeko aukera egongo da. Bestalde, Albaolaren berri ematen ari dira Txilen, ontzigintza kongresu batean.
Pasaitarrek Albaolako lana bertatik bertara ezagutzeko aukera izango dute. Albaolak bere ateak itxi zituen pasa den asteburuan, baina datorren larunbata goizean pasaitarrentzat irekiko ditu ateak, dohainik.
Aurrez erreserba egin beharko dute, eta itsasontzian joango dira itsas faktoriaraino. Telefonoz —943 39 24 26—edo e-posta bidez jarri beharko da harremanetan. Bisitatu ahal izateko, baieztapen mezua jaso beharko da. Bertan adieraziko dituzte jarraibideak, itsasontzia hartzeko tokia eta ordutegia.
Albaola, Txilen
Bihar —hilak 4, asteazkena— Txileko Kultura, Ondare eta Arte ministerioak antolatutako mintegi batean parte hartuko du Xabier Agote itsas faktoriako presidenteak. Ontzigintzaren kulturari buruz arituko da, baita arloa babesteko lanari buruz ere.
Mintegia 21:00etan hasiko da —Euskal Herriko ordutegian—, eta zuzenean jarraitu ahal izateko esteka honen bitartez egin beharko da.
Albaolak orain duela hiru urte hasi zituen Txileko eragileekin harremanak. Ez dira estutzen ari diren harreman bakarrak. Aurten Lorienten eta Vannesen (Bretainian) egindako jardunaldietan parte hartu dute, eta Bordeleko Fete du Vin jaialdian izango duten parte hartzea prestatzeko bilerak egin dituzte. Hermione La Fayette elkartearekin hitzarmena sinatzeko prozesuan daude.
