Topoaren abandonua salatzeko agerraldia egin du EH Bilduk
Pasaia, Errenteria-Orereta eta Donostiako EH Bilduko zinegotziek Eusko Jaurlaritzari eskatu diote herritarron dirua xahutzeari utz diezaion, topoaren lurperatzea nahiz geldirik dagoen Altza-Galtzaraborda pasantea geldirik delarik.
Ezkerretik eskuinera, Iraitz Pazos eta Mikel Garcia (EH Bildu Pasaia); Garbiñe Alkiza eta Zigor Etxeburua (EH Bildu Donostia); eta Eneko del Amo (EH Bildu Errenteria-Orereta). 
Pasai Antxoko topoari eusten dioten zubiek eremu ilunak sortzen dituztela uste dute.
Pasaia, Errenteria-Orereta eta Donostiako EH Bilduko zinegotziak gaur goizean Pasai Antxoko topoko geltokiaren aurrean bildu dira, Eusko Jaurlaritzaren “kudeaketa txarra salatzeko”. Altza-Galtzaraborda pasabidearen lanei lehenbailehen ekin diezaiola eskatu diote, badiako bizilagunen ezinbesteko beharrak asez, horien artean, topoaren lurperatzea.
Agerian jarri nahi izan dute Jaurlaritzak dirua ezinbestekoak ez diren azpiegituretan inbertitu duela, horien artean, Donostiako zentroko lanak, alderdia aspalditik eskatzen ari den Antxoko topoaren lurperatzea nahiz egun geldirik dagoen Altza-Antxo-Galtzaraborda pasantea abandonatuta duelarik.
Jaurlaritzak orain geldirik dagoen Donostiako pasantearen obra hasi zuenean, Altza-Antxo-Galtzaraborda proiektua geldiarazi zuen, Altzako geltokia jarraipenik gabe utziz. Ondorioz, linearen maiztasunak bikoizteko aukera alboratu behar izan da, eta herria erdibitzen duen zubiak dakartzan elkarbizitza arazoei ez zaio oraindik konponbiderik eman.
Pasai Antxoko topoaren sarbidea.
Zinegotziek salatu nahi izan dute kudeaketa horrek badiako bizilagunen egunerokotasunean eragiten dituen zailtasunak: “Bada garaia politikak herritarren bizi baldintzak hobetzeko, eta horrek ekarriko du garraio publikoan inbertitzea, gipuzkoarrok egunero erabiltzen dugun garraio publiko hori indartzea”.
Aldarrikatu dute onartezina dela Eusko Jaurlaritzak guztiz abandonatuta utzi izana eremua: “Hau zonalde degradatutzat izendatzea, gero inbertsioak beste nonbaitera eramanda, Donostiako zentrora, adibidez. Ulergaitza zaigu guztiz EAJ eta PSE-EEk Altza-Antxo-Galtzaraborda bezalako proiektu bat alboratzea, kutxa batean sartzea, eta beharrik ez duten azpiegituratan xahutzea gure dirua. Hori ziur ez dute herritarrek ulertzen, eta ezta guk ere”.
Garraio publikoaren gabeziak, pandemia garaian
Gestio desegoki hori pandemia garaian agerian gelditu dela uste du EH Bilduk: “Erakunde publikoek ez dute behar adina diru inbertitu garraio publikoan. Ikusi baino ez dago pilaketak dauden une horiek saihesteko baliabiderik ez dagoela. Beraz, Eusko Jaurlaritzari esan nahi diogu nahikoa dela. Inbertitzeko herritarrek beharra duten proiektuetan, Altza-Galtzaraborda bezalako proiektuetan: eremu honetan topoa lurperatzeko, maiztasunak bikoizteko, sortzen diren zarata arazoak konpontzeko; eta utz diezaiola beharrezkoak ez diren azpiegituretan inbertitzeari”.
