Astelehenean irekiko dute Heltan izena emateko epea
21 ikastaro emango dituzte ezohiko ikasturtean. Abenduaren 11ra arte eman ahal izango da izena bertan.
Otsailean Heltak bibliotekan egin zuen erakusketa. Beste hainbatentzat bezala, 2020-2021 ikasturtea ezohikoa izango da Oiartzungo Helduen Tailerrekoentzako (Helta). Abenduan hasiko dute ikasturtea, eta izena emateko epea abenduaren 11n bukatuko da.
Aurten 21 ikastaro eskainiko ditu Heltak. Horietako bi izango dira berriak: Emozioak eta norbera ezagutzen eta Ipuin eta kondairekin norbere burua zaindu. Informazio gehiago behar duenak, 618 09 11 76 telefono zenbakira deitu beharko du.
Horrez gain, doako bi ikastaro emango dituzte: Zen meditazioa, hileko lehen larunbatetan, 09:45etik 11:30era; eta meditazio dinamikoa, ostiraletan 18:30etik 20:00etara. Biak Iturriotzen izango dira.
Ikasturte osoaren prezioa 65 eurokoa izango da oiartzuarrentzat, eta 90 kanpokoentzat. Hiruhileko bakoitzaren prezioa, berriz, 35 eta 45 euro izango dira, hurrenez hurren. Herrikoek zein 55 urtetik gorakoek lehentasuna izango dute izena emateko orduan. Edukieran mugak izango dituzte, eta, gaindituz gero, zozketa egingo dute.
Izena emateko Heltaren webgunea bisita daiteke, edo Karaezko lokaletik pasatu. Bertara joateko ordutegia 10:00etatik 12:00etara eta 17:00etatik 19:00etara izango da, astelehen eta ostegunetan.
Esteka honetan klik eginda ikus daitezke ikastaroen ordutegiak.
