Hikaldia egingo dute Oiartzunen, modu pilotuan
Euskaraldiak irauten duen bitartean Hikaldia egingo dute, Bergararekin batera. Pegatina txiki bat jarri beharko da txaparekin batera.
Asier Kortabarria eta Aitzol Perez de San Roman, Bergara eta Oiartzungo arduradunak, hurrenez hurren. Hilaren 20tik abenduaren 4ra bitartean egingo da Euskaraldiaren bigarren ekitaldia. Horrekin batera, Oiartzunen eta Bergaran beste ariketa bat egingo dute: Hikaldia. Esperientzia pilotua izango da bi udalerrietan egingo dena.
Euskaraldian jantziko den txaparen gainean h txiki bat duen pegatina bat itsatsi beharko dute Hikaldian parte hartuko duten Ahobizi eta Belarriprestek. Hitanoarekiko atxikimendua adieraziko da modu horretan.
Hala ere, zehaztu dute ez dela Euskaraldiko rolari zuzenean lotuta egongo. Hika aritzeko edo entzuteko gogoa dutela erakutsiko dute. “Ahobiziek ez dute hika hitz egiteko konpromisoa hartuko. Pegatina hau daramanak, bere gaitasunaren arabera eta egoeraren arabera erabakiko du hika egin edo ez”.
Arauak eta ulermena
Hitanoak bere arau propioak ditu, eta antolatzaileek adierazi dute pegatina eramaten duen bakoitzaren esku dagoela arau sozial horiek errespetatzea edo era malguan jokatzea. “Hori bai”, zehaztu dute, “betiere, solaskidea ados badago, bestela neutroan ariko gara errespetuz”.
Ulermena beti ziurtatu behar dela gogorarazi dute, eta solaskidearentzat zaila baldin bada hika ulertzea, neutrora pasatzeko eskatu dute.
Parte hartu nahi duenak galdetegi hau bete beharko du, eta Euskaraldiko txapa jasotzearekin batera, pegatina txikia ere jasoko du.
Iniziatiba honekin hitanoaren erabilerari bultzada eman nahi diote. Behin pasatuta, balorazioa egingo dute, eta aurrera begirako urratsak zehaztuko dituztela iragarri dute.
