Amazon herrian ezartzearen kezkak Euskaldendak eta udala batu ditu
Udala eta merkatarien elkartea bildu dira, Lanbarrengo azpiegituraren harira sortutako kezka partekatzeko. Zer egin dezaketen aztertu dute.
Lanbarren industriagunearen ikuspegia. Orain arte San Jose Lopez garraio eta logistika enpresarenak izan diren azpiegitura erosi du inbertsio funts batek. Zurrumurruen arabera, Amazonek eremu hori alokatzeko interesa dauka.
Horren harira, Oiartzungo Udala eta Euskaldendak-Dendartean merkataritza elkarteak bilera egin dute. Udal erakundearen aldetik Jexux Leonet alkatea izan da bertan, eta merkatarien aldetik, berriz, Bittor Lizarribar eta Amador Viteri presidenteak.
Leonetek udal gobernu taldearen kezka helarazi die merkatariei, eta argitu die Oiartzungo hirigintza planeamenduaren arabera, eremu hori bakarrik jarduera logistiko edota industrialerako erabil dezaketela. Jarduera horietarako, beraz, udalak ezingo luke jarduera-lizentziarik ukatu.
Bere aldetik, Dendartean/Euskaldendak elkarteak eskaera bat aurkeztu dio udalari: Amazonek Oiartzunen egin nahi duen jarduera logistika bezala ez izendatzea. Horren ordez, txikizkako salmenta gisa katalogatzea proposatu dute. Modu horretan, Oiartzungo Hiri Antolamendu Plan Orokorrarekin eta Eusko Jaurlaritzaren Establezimendu Komertzial Handien legearekin talka egingo luke.
Oiartzungo Udalak egindako ekarpena eskertu dio Dendartean/Euskaldendak-i eta bide hori aztertzeko konpromisoa hartu du.
Horretarako, udaleko zein Eusko Jaurlaritzako zerbitzu teknikoei txostenak eskatuko dizkie. Horrez gain, Leonetek konpromisoa hartu du merkatariek egindako bideragarritasuna neurtzeko beste txosten bat eskatzea kanpoko zerbitzu juridikoei.
