Saharako herriari elkartasuna adierazi dio udalbatzak
Sahara-Euskadi elkartearen mozioa aho batez onartu dute zinegotziek. Datorren urteko zerga eta tasak behin betiko onartu dituzte.
El Watan elkarteko kideek 'eskerrik asko' esan zieten zinegotziei, aldeko botoa eman ondoren. Oiartzungo Udalbatzak azaroari dagokion plenoa egin zuen atzo arratsean. Saharari buruzko mozioa aztertu zuten, Sahara-Euskadi elkartearena.
Saharako herriari elkartasuna adieraztea onartu zuten EH Bildu eta EAJko zinegotziek. Nazio Batuen Erakundeari eskatu diete sahararren eskubideak berma ditzaten. Erreferendumaren aldeko apustua egin dute, eta Sahararen aldeko manifestazioekin bat egin.
Mendiburu 14, martxan
Udal politikei dagokienez, datorren urteko zerga eta tasak onartu zituzten behin betiko. Salbuespen batekin, ez dira igoko. EAJk abstentzioaren alde egin zuen botazioan.
Madalensoro eta Elorsoro kirol instalazioen kudeaketa kontratua beste urte batez luzatu zuten.
Mendiburu 14 eraikinaren egoeraren berri eman zuten. Hilaren 12an hasi ziren berriro lanean, lurra finkatu ondoren. Obrek jarraitzen badute ere, eremuaren zaintza etengabea izango dela jakinarazi zuten.
Oarsoaldea Garapen Agentziari ekarpena egitea ere onartu zen, ahobatez. 255.000 € bideratuko ditu Oiartzunek hiri berriztapen, turismo eta kontsumo, gizarteratze eta industria sustapen arloetako programetara.
Azkenik, 2021erako aurreikusitako ekitaldiei diru laguntzak bideratzea onartu zuten, hau ere aho batez. 43.290 euro bideratuko dira horretara.
Bukatzeko, Eneritz Arbelaitz zinegotziak Euskaraldiari buruzko adierazpena irakurri zuen, Eusko Jaurlaritzak, Eudelek, aldundiek eta EAEko hiriburuetako udalek adostutakoa.
