Haurtzaroko LH4ko ikasleek janaria ongi aprobetxatzeko kartelak jarri dituzte
Kartelak kalean jartzeko eskaera egitera joan dira udaletxeraino. Jakiak ez botatzeko kontzientziatu nahi dute ikasleek.
Haurtzaroko ikasle ordezkariak Danel, Unai, Maddi, Nahia, Miren, Arene, Valentin eta Gorka izan ziren. Argazkian, Eneritz Arbelaitz alkateordearekin. LH4ko ikasleek kanpaina egiten ari dira, elikagaiak ongi aprobetxatu behar direla kontzientziatzeko. Atzo, Haurtzaro Ikastolako hainbat ikasle udaletxeraino hurbildu ziren, gaiari buruzko informazioa biltzen duten kartelak jartzeko baimena eskatzera. Idatzia hemen irakur daiteke.
Udalari egindako lana eskertu diote, eta hainbat gomendio helarazi zizkioten erakundeari: esaterako, janaria hozkailuan edo izozkailuan gordetzea, hobeto kontserbatzeko; erosketak egitera zerrendarekin joatean, beharrezkoa soilik erosteko; sobratutako janaria tuperretan gordetzea eta janaria aprobetxatzeko errezetak egitea (marmeladak, konpotak, ontziratzeak…).
Urtean 1.300 milioi tona janari botatzen dira munduan, pertsonek kontsumitzen dugun elikagaien herena. Udalak ikasleak egindako lanarengatik zoriondu ditu eta herritarrei gai honen garrantziaz jabetzeko eskatu nahi die. “Izan ere”, zehaztu dute, “hondakin onena, sortzen ez dena baita”.
