Leteri buruz arituko dira bihar bera ikertu duten bi idazle
Azmarrin taldeak antolatuta, 'Leteren oihartzuna' hitzaldia emango dute bihar arratsaldean Ainhoa Urien eta Alex Gurrutxagak.
Ostiralean beteko dira hamar urte Xabier Lete hil zela. Oiartzungo Azmarrin taldeak Leteren oihartzuna hitzaldia antolatu du bihar —hilak 2— arratsalderako. Udaletxeko pleno aretoan izango da, 19:00etan hasita.
Leteren lana eta figura ikertu duten bi idazle gonbidatu ditu Azmarrin-ek: Alex Gurrutxaga eta Ainhoa Urien. Goiatz Labandibarrek gidatuko du mahai-ingurua. 30 pertsonako edukiera bete arte sarrera libre izango da.
Liburu bana, aurten
Biek ala biek Leteri buruzko liburuak argitaratu dituzte aurten bertan. Gurrutxagak Xabier Lete. Aberriaren poeta kantaria saiakera kaleratu zuen udaberrian Alberdaniarekin. Bertan, Leteren sorkuntzan eta letretan zer dagoen azaleratu nahi izan du idazle zarauztarrak. Leteri buruzko tesia idatzi zuen arren, saiakera liburua “irakurlearekin elkarrizketa” bat bezala definitzen du egileak.
Urienek, berriz, Poesia, zaurien ukendu. Xabier Leteren arrastoan liburua argitaratu zuen Pamielarekin, udazken hasieraren bueltan. Urieni 14 urterekin piztu zitzaion Leterekiko zaletasuna, eta gradu amaierako lana figura horrekin egin du. Saiakeratik, kronikatik, poesiatik, biografiatik eta autobiografiatik badu liburuak. Urienek azaltzen du hitzak izan zirela Leterentzat zauri propioak sendatzeko “ukendua”.
