'La mochila invisible' dokumentala online ikusteko aukera izango dute oiartzuarrek
Bidez Bide elkarteak egindako dokumental honetan, kartzelako errealitatea ezagutzeko balioko du, ikuspegi feminista batetik. Hiru preso ohiren testigantzak ditu.
Udaleko Feminismo Sailak La mochila invisible (Motxila ikusezina) dokumentala online ikusteko aukera emango die oiartzuarrei, gaurtik hasi eta hilaren 21a arte.
Bidez Bide elkarteak egindako dokumental honetan, kartzelako errealitatea ezagutzeko balioko du, ikuspegi feministatik. Kartzelatik pasatutako hiru emakume elkarrizketatzen ditu Laura Hernandez Vela zinemagileak: Katia Reimberg, Rosivan Cirino eta Maria Teresa Valencia.
65 minutuko zintan, kartzelan egondako emakume atzerritarrek pairatzen duten estigmatizazio hirukoitza bistaratu nahi du lanak: preso egoteagatik, emakume izateagatik eta atzerritarrak izateagatik.
Jatorrizko bertsioa gazteleraz bada ere, euskaraz azpititulaturik emango da ikus-entzunezkoa. Dokumentala ikusteko lotura esteka honetan klik eginda lortzen da.
Azaroan, emakumeenganako indarkeria instituzionalaren hainbat aurpegi ikusarazteko zikloa antolatu zuen Feminismo sailak. Horietako bat izan zen kartzelari feminismotik begiratzea, Ekhiñe Eizagirre eta Katia Reimberg (dokumentalaren protagonistetako bat) preso ohien testigantzekin. Dokumental hau saio hura osatzera dator.