[Bideoa] Herritarrei erostea hautua dela aldarrikatu dute
Oiartzunek izan duen saltoki handien bilakaerari errepasoa ematen dion bideoa sortu dute, Amazonen kokapenaren bezperatan.
Lanbarren industriagunean Amazonek plataforma logistikoa jartzeko duen asmoa dela eta, herritarrak mobilizatzen hasi dira. Horrela, datorren larunbatean auto karabana egingo dute —hilerriko aparkalekuan, 11:00etan—, eta ondoren elkarretaratzea egingo dute Lanbarren industriagunean. Egin irri, izan herri izeneko kolektiboak deitu du protesta ekitaldia.
Horrez gain, bideo bat sortu dute. Bertan Oiartzunen 1977tik lehorreratu diren saltoki handiak zein frankiziei errepasoa eman diete. Mamut izan zen Euskal Herriko lehen merkatalgune handia, eta beste hainbatek jarraitu zituzten multinazional frantziarraren urratsak.
Amazon jartzearen kontra dagoen taldeak gogorarazi du herriko merkataritzan izan duen eragin negatiboa: “Saltoki handi eta almazenak biderkatzen ziren erritmo berean, herriko dendak pertsianak jaisten hasi ziren. Badakigu gure herria zer izan zen, badakigu gure herria zer den eta irudikatu dezakegu, zer izateko bidean dagoen. Herritarrei erostea ere hautu bat da”.
