Presoen auziari konponbidean bidea izateko zitak jarri ditu Sarek
Datozen egunetarako lau hitzordu jarri dituzte, datorren asteburuan hasita. Joanes Larretxea euskal herriratzea eskatuko dute igandean.
Hainbat oiartzuarrek deia egin zuten, igandeko ekitaldian parte hartzera gonbidatuz. Oiartzungo Sarek lau deialdi luzatu ditu datozen egunetarako. Presoen auziari konponbidea jartzeko urratsak ematera animatu dituzte oiartzuarrak. “Egoeraren larritasuna ikusirik, beharrezkoa baita hurrengo egunetan ere bidea izatea”, nabarmendu dute.
Lau data jarri dituzte. Donostiara joateko deialdia luzatu dute, datorren larunbatean, hilak 26. 11:00etan, kalejira egingo dute Martuteneko espetxetik Loiola auzoko plazara bitartean, Patinetean joan nahi dut aita/ama ikustera! lelopean.
Biharamunerako, berriz, Joanes Larretxea herriko presoa Euskal Herrira ekartzearen aldeko maratoia egingo dute, plazan. 10:00etatik 20:00etara bitartean, kilometroak pilatuko dituzte, bakoitzak ordu laurdenez. Oraindik izena emateko aukera dagoela jakinarazi du Sarek. Elorsoro kiroldegitik pasatu behar da txanda hartzeko, eta horretarako gonbita luzatu dute.
Urtarrilaren 2rako —larunbata—, agerraldi jendetsua deitu dute, ikastolako anfiteatroan. 12:00etan elkartuko dira, eta Covid-19ak kartzelan eta urrunketak sortutako arazoen berri eman eta salatuko dituzte.
Urtarrilaren 9an, berriz, Sarek mobilizazio nazionala egingo du. Bakoitzaren udalerri edota auzoan egingo dituzte ekintzak. Oiartzunen kasuan, auzoetan zutabeak antolatuko dituzte,eta gero denak Madalensoro kanpoaldean elkartuko dira, 17:30 inguruan.
Ekitaldi guztietan segurtasun neurriak beteko dira iragarri du Oiartzungo Sarek.
